Eviniz təmiz olduğu halda niyə daim tozlanır? Diqqətdən kənarda qalan 5 mənbə

Evdə təmizlik apardıqdan sonra mebellərin, televizorun və rəflərin üzərində qısa müddət ərzində yenidən toz yığılması bir çox insanın qarşılaşdığı problemlərdəndir. Lakin evdəki tozun mənbəyi təkcə açıq pəncərələr və ya çöldən gətirilən çirk deyil.

Gundelik.az xəbər verir ki, kondisioner filtrlərindən köhnə xalılara, ev heyvanlarından köhnəlmiş pəncərə rezinlərinə qədər bir çox amil evdəki tozun miqdarını artıra bilər.

1.Kondisioner və havalandırma filtrləri

Evdə tozun yığılmasının səbəblərindən biri müntəzəm təmizlənməyən kondisioner və havalandırma filtrləri ola bilər. Filtrlərdə toplanan toz və çirk hava axını ilə yenidən otağa yayıla bilər.

Buna görə də kondisioner filtrlərinin istehsalçının təlimatlarına uyğun təmizlənməsi və lazım gəldikdə dəyişdirilməsi tövsiyə olunur. Filtrlərə müntəzəm qulluq edilməsi evdəki tozun miqdarını nəzarətdə saxlamağa kömək edə bilər.

2. Köhnə xalçalar və ev tekstili məhsulları

Xalçalar, pərdələr, yorğanlar və divan üzlükləri zamanla toz və müxtəlif hissəcikləri özündə toplaya bilər. Xüsusilə köhnəlmiş parçalardan qopan liflər evdə tozun yaranmasına səbəb ola bilər.

Tozun yığılmasını azaltmaq üçün xalçaların və divanların müntəzəm tozsoranla təmizlənməsi, pərdələrin yuyulması və yataq dəstlərinin həftəlik dəyişdirilərək yuyulması tövsiyə olunur. Daha az toz saxlayan və asan təmizlənən ev tekstili məhsullarına üstünlük vermək də təmizlik prosesini asanlaşdıra bilər.

3. Ev heyvanlarının dəri qalıqları

Pişik və itlərin tük tökməsi evdə tozun yaranmasının ən çox bilinən səbəblərindən biridir. Lakin heyvanların tökülən tükləri ilə yanaşı, dəri qalıqları da ev tozuna qarışa bilər.

Ev heyvanlarının müntəzəm daranması, yatdıqları yerlərin təmizlənməsi və evin tez-tez tozsoranla təmizlənməsi tozun yığılmasını azaltmağa kömək edə bilər. Xüsusilə heyvanların çox vaxt keçirdiyi divan və xalçaların təmizliyinə diqqət yetirmək lazımdır.

4. Köhnəlmiş qapı və pəncərə rezinləri

Pəncərələr bağlı olsa belə, çöldəki toz, polen və digər xırda hissəciklər müxtəlif boşluqlardan evə daxil ola bilər. Zamanla köhnələn qapı və pəncərə rezinləri də bu keçidi asanlaşdıra bilər.

Evdə tozun miqdarını azaltmaq üçün qapı və pəncərələrin izolyasiyasını yoxlamaq, zədələnmiş rezinləri yeniləmək vacibdir. Evi havalandırarkən çöldəki hava şəraitini də nəzərə almaq lazımdır.

5. Televizor və elektron cihazların ətrafı

Televizor, kompüter və oyun konsolu kimi elektron cihazların ətrafında zamanla toz toplana bilər. Xüsusilə cihazların arxa hissələri və kabellərin yerləşdiyi sahələr təmizlik zamanı asanlıqla diqqətdən kənarda qala bilər.

Bu sahələrin müntəzəm tozunun alınması yığılmış hissəciklərin yenidən havaya yayılmasının qarşısını almağa kömək edə bilər. Elektron cihazları təmizləyərkən istehsalçının istifadə təlimatlarına əməl etmək, quru və yumşaq mikrofiber parçadan istifadə etmək tövsiyə olunur.

Nuri
Gundelik.az