450 milyon dollarlıq rəsm ətrafında sensasiya: Süni intellekt Leonardo da Vinçinin müəllifliyini şübhə altına aldı

2017-ci ildə hərracda rekord qiymətə, 450 milyon dollara satılan “Dünyanın xilaskarı” (“Salvator Mundi”) tablosunun kim tərəfindən çəkildiyi ilə bağlı yeni iddia ortaya atılıb. Süni intellektin apardığı təhlil əsərin məşhur italyan rəssamı Leonardo da Vinçinin deyil, onun tələbələrindən birinin əsəri ola biləcəyini göstərib.

Gundelik.az xəbər verir ki, bu barədə UNIAN Polşanın Interia portalına istinadən məlumat yayıb.

Məlumata əsasən, Braziliyanın Luminari adlı süni intellekt sistemi tablonu təhlil edərək onun Leonardo da Vinçinin tələbəsi Covanni Antonio Boltraffio tərəfindən çəkilməsi ehtimalını 81 faiz qiymətləndirib.

Bu iddia təsdiqini taparsa, əsərin həqiqi bazar dəyərinin 2017-ci ildə hərracda ödənilən məbləğdən xeyli aşağı ola biləcəyi ehtimal edilir. Bununla belə, süni intellekt sisteminin hansı meyarlar əsasında belə nəticəyə gəldiyi barədə ətraflı məlumat verilməyib.

Mütəxəssislər süni intellektin nəticəsinə ehtiyatla yanaşırlar

Leonardo da Vinçinin yaradıcılığı üzrə tanınmış ekspert, professor Frank Zöllner hesab edir ki, süni intellektin təhlili bu cür mübahisələrin araşdırılmasına kömək edə bilər. Lakin onun fikrincə, texnologiyanın nəticələri əsərin müəllifini qəti şəkildə müəyyənləşdirmək üçün kifayət deyil.

Beləliklə, tablonun müəllifliyi ilə bağlı mübahisə hələ də açıq qalır və süni intellektin irəli sürdüyü ehtimalın əlavə araşdırmalara ehtiyacı var.

450 milyon dollarlıq tablo indi haradadır?

“Salvator Mundi” 2017-ci ildə “Christie's” hərracında 450 milyon dollara satılaraq dünyanın ən bahalı rəsm əsəri kimi tarixə düşüb. Əsərin Səudiyyə Ərəbistanının vəliəhdi Məhəmməd bin Salman tərəfindən alındığı bildirilir.

Həmin vaxtdan bəri tablo ictimaiyyətə nümayiş etdirilməyib. Gələcəkdə onun Ər-Riyadda yaradılması planlaşdırılan Dünya Mədəniyyətləri Muzeyində sərgilənməsi nəzərdə tutulur.

İndi isə əsərin müəllifliyi ilə bağlı ortaya çıxan yeni iddia həm sənət dünyasında, həm də rəsm kolleksiyaçıları arasında əlavə suallar yaradır: 450 milyon dollar ödədilən şah əsər həqiqətən Leonardo da Vinçinin əl işidirmi?

Nuri
Gundelik.az