Mədəniyyət təşəbbüskarı Gülçin Aslanlı: “Mədəniyyət yalnız mənəvi dəyər deyil, həm də iqtisadi inkişaf imkanları yaradan sahədir”

Müasir dövrdə mədəniyyət yalnız tarixi irsin qorunması və mənəvi dəyərlərin təbliği ilə məhdudlaşmır. Bu sahə eyni zamanda sahibkarlıq, yaradıcı iqtisadiyyat və yeni biznes imkanlarının formalaşması baxımından mühüm potensiala malikdir.

Bu barədə Gundelik.az-a açıqlamasında sahibkar, yaradıcı lider və mədəniyyət təşəbbüskarı, ASLANLI MUSEUM – Mədəniyyət və Yaradıcılıq Mərkəzinin təsisçisi və rəhbəri Gülçin Aslanlı bildirib.

Onun sözlərinə görə, mədəniyyət sahibkarlığı yaradıcı ideyaların iqtisadi dəyərə çevrilməsi, mədəni layihələrin yeni fəaliyyət istiqamətləri qazanması və cəmiyyət üçün davamlı dəyər formalaşdırması baxımından xüsusi əhəmiyyət daşıyır.

Gülçin Aslanlı qeyd edib ki, mədəniyyət sahəsində sahibkarlığın inkişafı üçün ən vacib amillərdən biri yaradıcı yanaşma ilə peşəkar idarəetmənin birləşdirilməsidir. Muzeylər, sərgilər, yaradıcı məkanlar, maarifləndirici proqramlar və mədəni tədbirlər düzgün konsepsiya əsasında qurulduqda həm sosial, həm də iqtisadi baxımdan səmərəli layihələrə çevrilə bilər.

“Mən hesab edirəm ki, mədəniyyət sahibkarlığı mədəni dəyərlərlə iqtisadi imkanlar arasında körpü yaradır. Yaradıcı ideya yalnız maraqlı konsepsiya olaraq qalmamalı, real layihəyə çevrilərək cəmiyyətə fayda verməlidir. Burada əsas məqsəd mədəniyyətin kommersiyalaşdırılması deyil, onun dəyərini qorumaqla yanaşı, davamlı inkişaf edə bilən fəaliyyət modelinin formalaşdırılmasıdır”, – deyə Gülçin Aslanlı vurğulayıb.

O əlavə edib ki, hər bir mədəni layihənin uğuru yalnız ideyanın orijinallığından deyil, həm də onun düzgün planlaşdırılmasından, hədəf auditoriyasının müəyyənləşdirilməsindən, maliyyə strategiyasından və tərəfdaşlıq imkanlarından asılıdır.

Mədəni layihələrdə davamlı biznes modelinin əhəmiyyətinə toxunan Gülçin Aslanlının fikrincə, müasir muzey və mədəniyyət məkanları ənənəvi fəaliyyət çərçivəsindən kənara çıxaraq çoxfunksiyalı yaradıcı platformalara çevrilməlidir.

Belə məkanlarda sərgilərlə yanaşı, ustad dərsləri, maarifləndirici görüşlər, yaradıcı seminarlar, tematik tədbirlər və korporativ əməkdaşlıq layihələri həyata keçirilə bilər. Bu isə həm yeni auditoriyanın cəlb olunmasına, həm də mədəniyyət müəssisələrinin maliyyə dayanıqlığının gücləndirilməsinə şərait yaradır.

Gülçin Aslanlı hesab edir ki, dövlət və özəl sektor arasında əməkdaşlığın genişləndirilməsi, sponsorluq imkanlarının artırılması və innovativ yanaşmaların tətbiqi mədəniyyət sahibkarlığının inkişafına əlavə təkan verə bilər.

“İdeyanın əsl dəyəri onun real nəticəyə çevrildiyi zaman üzə çıxır. Uğurlu mədəniyyət layihəsi həm mənəvi və sosial dəyər yaratmalı, həm də iqtisadi baxımdan dayanıqlı olmalıdır. Mənim fəaliyyət fəlsəfəmin əsasını da mədəniyyəti yaradıcılıqla birləşdirmək, ideyaları real layihələrə çevirmək və cəmiyyət üçün uzunmüddətli dəyər yaratmaq təşkil edir”, – deyə Gülçin Aslanlı bildirib.

Nuri
Gundelik.az