Bəzi amerikalı turistlər xaricdə anti-amerikan reaksiyasından yayınmaq üçün çamadanlarına Kanada bayrağı tikərək özlərini kanadalı kimi təqdim edirlər. Bu praktika Kanadada ciddi narazılıq doğurub və “bayraq kopyalama oyunu” kimi tanınmağa başlayıb.
Bu barədə Gundelik.az xarici mediaya istinadən xəbər verir.
Belə ki, Nyu-York ştatından olan Çelsi Metzger ilk dəfə Dominikan Respublikasında istirahət edərkən kanadalı kimi davranıb. O, Fransız-Kanada barında ABŞ–Kanada xokkey oyununa baxarkən amerikalı olduğunu elan etdikdə sərt reaksiya ilə üzləşdiyini, daha sonra isə bir taksi sürücüsünün onu amerikalı olduğuna görə qəbul etmədiyini bildirib. Bundan sonra bir neçə həftə kanadalı olduğunu iddia edib.
Oxşar hadisə Yunanıstanda baş verib. Miçiqan ştatından olan iki gənc qadın restoranda amerikalı olduqları bəlli olduqda mənfi münasibətlə qarşılaşdıqlarını, buna görə də özlərini kanadalı kimi təqdim etdiklərini etiraf ediblər. Lakin Kanada ilə bağlı sadə suallara cavab verə bilmədiklərinə görə yalanları üzə çıxıb.
Kanadalıların sərt reaksiyası
Kanadalı mədəniyyət şərhçisi Tod Maffin sosial şəbəkədə yaydığı videoda bu davranışı “mədəni saxtakarlıq” adlandıraraq sərt tənqid edib. Onun sözlərinə görə, liberal və ya mühafizəkar fərq etmədən, amerikalıların Kanada bayrağını “görünməzlik qalxanı” kimi istifadə etməsi yolverilməzdir.
Toronto Universitetinin professoru Robert Şertzer isə bildirib ki, Donald Tramp administrasiyasının ticarət müharibələri, Kanadanı “51-ci ştat” adlandırması və baş nazir Castin Trüdoya qarşı təhqiramiz çıxışları Kanadada millətçiliyi daha da gücləndirib.
Artan millətçilik və boykot çağırışları
Kanadada “Kanada al”, ABŞ məhsullarına qarşı boykot kampaniyaları, hətta Amerika himninin ifasına qarşı etirazlar artmaqdadır. Baş nazir Castin Trüdo da Kanadanın kimliyinin “amerikalı olmamaqla” müəyyənləşdirildiyini vurğulayıb.
Kanadalılar amerikalıların bayraqlarından “qalxan” kimi istifadə etməsini ölkənin müsbət imicinə xələl gətirən, təkəbbürlü və aldadıcı davranış kimi qiymətləndirirlər.
“Məsələ sadədir: dünyada kanadalı olduğunu desəniz, nadir hallarda pis qarşılanarsınız. Amma eyni şey amerikalılar üçün keçərli deyil. Həll yolu bizim paltarlarımızı geyinmək deyil, öz evinizi düzəltməkdir”, – deyə Tod Maffin bildirib.
Gundelik.az
