ABŞ Prezidenti Donald Tramp ölkənin 30 ildən artıq fasilədən sonra nüvə silahı sınaqlarını bərpa etməsi barədə göstəriş verib.
Gundelik.az xəbər verir ki, Tramp qərarına əsas səbəb kimi Rusiya və Çin kimi dövlətlərin nüvə sınaqları proqramlarında əldə etdikləri irəliləyişi göstərib. O, sosial şəbəkədəki paylaşımında qeyd edib: “Digər ölkələrin həyata keçirdiyi sınaq proqramlarına cavab olaraq Müdafiə Nazirliyinə nüvə silahı sınaqlarımızı bərabər əsaslarla bərpa etməyi tapşırmışam”.
Bu açıqlama Trampın Cənubi Koreyada Çin prezidenti Si Tsinpinlə görüşündən əvvəl dərc olunub. Prezident vurğulayıb ki, ABŞ dünyada ən çox nüvə silahına sahib ölkədir, Rusiya ikinci, Çin isə “uzaq üçüncü” yerdə qərarlaşıb.
Qeyd edək ki, ABŞ sonuncu dəfə 1992-ci il sentyabrın 23-də Nevada ştatında, “Divider” kod adlı yeraltı obyektində nüvə sınağı keçirib. Los Alamos Milli Laboratoriyasının məlumatına görə, bu, ölkənin 1054-cü nüvə sınağı olub.
Tramp həmçinin bildirib ki, nüvə silahının “böyük dağıdıcı gücündən” xəbərdardır, lakin birinci prezidentlik dövründə ABŞ-ın nüvə arsenalını yeniləməyin “qaçılmaz” olduğunu düşünür. O, Çinin nüvə proqramının beş il ərzində ABŞ səviyyəsinə yaxınlaşa biləcəyini də qeyd edib.
Prezident sınaqların necə həyata keçiriləcəyi barədə təfərrüat verməsə də, “prosesin dərhal başlayacağını” bəyan edib.
Hazırda Nevada Sınaq Sahəsi ABŞ hökumətinin nəzarətində qalır. Smithsonian İnstitutunun Nüvə Elmləri və Tarixi Muzeyinin məlumatına görə, zərurət yarandığı halda ərazi yenidən nüvə sınaqları üçün istifadə oluna bilər.
Gundelik.az
