ABŞ Prezidenti Donald Tramp Cənubi Koreyadan idxal edilən məhsullara tətbiq olunan tarifləri 25%-ə yüksəltdiyini açıqlayıb. O, Seulu ötən il əldə olunan ticarət razılaşmasının şərtlərinə “əməl etməməkdə” ittiham edib.
Tramp sosial şəbəkədə paylaşımında bildirib ki, avtomobillər, taxta məmulatları, dərman preparatları və “bütün digər qarşılıqlı TARİFLƏR” daxil olmaqla, geniş məhsul çeşidi üzrə tariflər 15%-dən 25%-ə qaldırılır.
O qeyd edib ki, Cənubi Koreya parlamenti razılaşmanı təsdiqləməkdə ləngiyir, halbuki ABŞ razılaşmaya uyğun olaraq tariflərini sürətlə azaldıb.
Cənubi Koreya isə bəzi mallara tariflərin artırılması ilə bağlı rəsmi bildiriş almadığını və məsələ ilə bağlı Vaşinqtonla təcili danışıqlar aparmaq istədiyini açıqlayıb. Bildirilib ki, hazırda Kanadada səfərdə olan Cənubi Koreyanın sənaye naziri Kim Çunq-kvan ən qısa zamanda Vaşinqtona gedərək ABŞ-ın ticarət naziri Hovard Latniklə görüşəcək.
Çərşənbə axşamı səhər Cənubi Koreyanın əsas fond indeksi olan Kospi düşsə də, günün sonuna doğru iri ixracatçı şirkətlərin səhmlərinin bahalaşması ilə təxminən 1,8% artım göstərib.
Seul və Vaşinqton ötən ilin oktyabrında razılaşma əldə etmişdi. Həmin razılaşmaya əsasən, Cənubi Koreya ABŞ-a 350 milyard dollar (256 milyard funt sterlinq) investisiya yatırmağı öhdəsinə götürmüşdü. Bu vəsaitin bir hissəsi gəmiqayırma sektoruna yönəldiləcəkdi.
Növbəti ay tərəflər razılığa gəlmişdilər ki, Cənubi Koreya razılaşmanı təsdiqləmə prosesinə başladıqdan sonra ABŞ bəzi məhsullar üzrə tarifləri azaldacaq.
Razılaşma 26 noyabrda Cənubi Koreya Milli Assambleyasına təqdim olunub və hazırda baxılma mərhələsindədir. Yerli mediaya görə, sənədin fevral ayında qəbul ediləcəyi gözlənilir.
Tarifləri idxal edən şirkətlər ödəyir. Bu halda, ABŞ şirkətləri Cənubi Koreyadan aldıqları mallara görə 25% vergi ödəyəcəklər.
Tramp Ağ Evdəki ikinci prezidentlik dövründə tariflərdən tez-tez xarici siyasət aləti kimi istifadə edir.
Şənbə günü o, Kanada Çinlə ticarət razılaşması bağlayacağı təqdirdə, bu ölkəyə 100% tarif tətbiq edəcəyi ilə hədələmişdi.
Bazar ertəsi Çin rəsmiləri Kanadanın Çinlə “strateji tərəfdaşlıq” razılaşmasının digər ölkələrə qarşı yönəlmədiyini bildirmişdi.
Kanadanın baş naziri Mark Karni isə ölkəsinin Çinlə azad ticarət razılaşması aparmadığını və bunu “heç vaxt” nəzərdən keçirmədiyini deyib. O əlavə edib ki, Kanada rəsmiləri bu mövqeni ABŞ tərəfinə açıq şəkildə çatdırıblar.
Bundan əvvəl Tramp ABŞ-ın Qrenlandiyanı ələ keçirmə planlarına qarşı çıxan səkkiz ölkəyə — o cümlədən Böyük Britaniyaya — idxal vergiləri tətbiq edəcəyini bildirmişdi. Qrenlandiya Danimarka Krallığının tərkibində muxtar ərazidir və Danimarka NATO üzvüdür.
Daha sonra Tramp Qrenlandiya ilə bağlı “gələcək razılaşma” istiqamətində irəliləyiş olduğunu əsas gətirərək tarif təhdidindən geri çəkildi. Lakin bu hadisə Danimarka və digər NATO müttəfiqləri ilə ABŞ arasındakı münasibətləri gərginləşdirdi.
Mənbə: BBC
Hazırladı: Ziyalə Əhmədli
Gundelik.az
