Zibil qalağından “Gucci” xəzinəsi: Aldo Guccinin tarixi villasına aid əşyalar bit bazarlarında qəpik-quruşa satılır
Vintage həvəskarları axtarışa çıxıb
“Gucci” ailəsinin tarixi iqamətgahından çıxarılan mebel, interyer əşyaları və şəxsi əşyalar ikinci əl mağazalarında və bit bazarlarında satışa çıxarılıb.
Gundelik.az kp.ru-ya istinadən xəbər verir ki, onların arasında ötən əsrin ortalarına aid lampalar, dizayner fotoçərçivələri, gündəliklər və hətta Aldo Gucciyə məxsus ola biləcək ayaqqabı qəlibləri də var.
Tarixi malikanənin əşyaları satışa çıxarılıb
Keçmiş dövrün cazibəsini qoruyub saxlayan “Gucci” ailəsinin malikanəsi 2023-cü ildə satışa çıxarılmışdı. Əmlakın ilkin qiyməti 15 milyon avro müəyyən edilsə də, sonradan 11,5 milyon avroya qədər endirilmişdi. Bir müddət əvvəl isə malikanə daşınmaz əmlak agentliyinin saytından yoxa çıxıb.
Görünür, moda tarixinin mühüm hadisələrinə şahidlik etmiş malikanə yeni sahibini tapıb. Lakin yeni sahibinin çoxsaylı şəxsi əşyalara və interyer nümunələrinə ehtiyac duymadığı, yaxud vintage əşyaların dəyərini qiymətləndirmədiyi ehtimal olunur.
Nəticədə malikanəyə aid bir sıra əşyalar komisyon mağazalarında və bit bazarlarında peyda olub.
Qiymətli əşyalar qəpik-quruşa satılır
Satışa çıxarılan əşyalar arasında dizayner fotoçərçivələri, ötən əsrin 40–50-ci illərinə aid çarpayıyanı tumbalar və lampalar, eləcə də keçmiş sahiblərin gündəlikləri var.
Ən diqqətçəkən tapıntılardan biri isə Aldo Gucciyə məxsus ola biləcəyi ehtimal edilən, ayaqqabı istehsalında istifadə olunan xüsusi qəliblərdir. Bu əşyalar cəmi 35–40 avroya satışa çıxarılıb. Halbuki onların həqiqi kolleksiya dəyərinin bundan dəfələrlə, hətta onlarla və ya yüzlərlə dəfə yüksək ola biləcəyi düşünülür.
Vintage həvəskarları axtarışa çıxıb
“Gucci” ailəsinin tarixi ilə bağlı bu əşyaların üzə çıxması antikvar və vintage həvəskarları arasında böyük maraq yaradıb. İndi kolleksiyaçılar ərazidəki bit bazarlarını və ikinci əl satış məntəqələrini gəzərək moda tarixinin bir parçasını əldə etməyə çalışırlar.
Beləliklə, vaxtilə lüks və zənginliyin simvolu olan malikanənin bəzi əşyaları indi adi ikinci əl mallar kimi satılır. Halbuki onların bir qismi üçün tarixi mənşə və “Gucci” irsi maddi dəyərindən daha böyük əhəmiyyət daşıya bilər.
Nuri
Gundelik.az
