Ənənəvi yeməklər dəyişir: Dubayda aşpazlar sevilən təamları daha sağlam hazırlamağa çalışır

Sevilən yeməklərin dadını qoruyaraq onların tərkibindəki şəkər, duz və yağ miqdarını azaltmaq mümkündürmü? Dubayda start götürən yeni kulinariya layihəsi məhz bu suala cavab axtarır. Aşpazlar və qida alimləri ənənəvi təamları müasir elmi yanaşmalarla yenidən hazırlamaq üçün bir araya gəliblər.

Gundelik.az xəbər verir ki, dünyada sağlam qidalanmaya marağın artması kulinariya sahəsində də yeni yanaşmaların yaranmasına səbəb olur. Artıq aşpazlar yalnız yeməklərin dadına deyil, onların qida dəyərinə və tərkibinə də xüsusi diqqət yetirirlər. Bu istiqamətdə Birləşmiş Ərəb Əmirliklərinin Dubay şəhərində maraqlı layihəyə start verilib.

“Gələcəyin dadı” (“Taste of Tomorrow”) adlanan təşəbbüs Dubay Gələcək Fondu və beynəlxalq qida şirkəti Kerry Group-un əməkdaşlığı çərçivəsində həyata keçirilir. Layihənin əsas məqsədi yerli mətbəxin məşhur yeməklərini daha sağlam alternativlərə çevirmək, lakin onların ənənəvi dadını qorumaqdır.

Layihədə yerli aşpazlar, yaradıcı şəxslər və qida alimləri iştirak edirlər. Onlar karak çayı, laban və luqaimat kimi bölgədə sevilən təamların reseptlərini yenidən işləyəcəklər. Əsas hədəf bu məhsulların hazırlanmasında şəkər, duz və yağ miqdarını azaltmaq, eyni zamanda dad keyfiyyətini mümkün qədər qorumaqdır.

Maraqlı məqamlardan biri də odur ki, iştirakçılar bu işi adi mətbəxdə deyil, xüsusi innovasiya laboratoriyalarında həyata keçirəcəklər. Komandaların qarşısına cəmi 10 gün ərzində yeni reseptlər hazırlamaq tapşırığı qoyulub. Bu prosesdə süni intellekt əsaslı alətlərdən də istifadə olunacaq.

Layihə çərçivəsində qidalanma, fiziki performans və ümumi rifah mövzularına xüsusi diqqət ayrılır. Beləliklə, məqsəd yalnız yeni reseptlər yaratmaq deyil, həm də gündəlik qidalanma vərdişlərinə fərqli yanaşma formalaşdırmaqdır.

Mütəxəssislərin bu təşəbbüsdə əsas diqqət yetirdiyi məsələ isə dad və sağlamlıq arasında tarazlıq yaratmaqdır. Çünki ənənəvi yeməklərin reseptini dəyişmək asan olsa da, insanların illərdir öyrəşdiyi dadı qorumaq daha mürəkkəb məsələdir.

Dubayda həyata keçirilən bu layihə gələcəkdə kulinariya dünyasında yeni tendensiyanın formalaşmasına təkan verə bilər. Bəlkə də yaxın illərdə sevdiyimiz ənənəvi yeməkləri daha az şəkərli, daha az yağlı, lakin əvvəlki qədər ləzzətli formada görəcəyik.

Nuri
Gundelik.az