Ədəbiyyat tarixində ilk: Elmi-fantastik roman Buker mükafatını qazandı!

Britaniyalı yazıçı M. Con Harrison 2026-cı il Buker mükafatının qalibi olub. 81 yaşlı müəllif bu uğurla mükafatın tarixində ən yaşlı qalibə çevrilib. Daha maraqlısı isə odur ki, onun elmi-fantastik janrda yazdığı roman bu nüfuzlu mükafata layiq görülən ilk belə əsər kimi tarixə düşüb.

Gundelik.az xəbər verir ki, dünya ədəbiyyatının ən nüfuzlu mükafatlarından biri hesab olunan Buker mükafatının builki qalibi açıqlanıb. Münsiflər heyəti mükafatı britaniyalı yazıçı M. Con Harrisonun “The End of Everything” (“Hər şeyin sonu”) adlı romanına verib.

81 yaşlı müəllifin qələbəsi ədəbi aləmdə böyük maraq doğurub. Harrison bununla Buker mükafatını qazanan ən yaşlı yazıçı olub. Eyni zamanda, onun əsəri elmi-fantastik janrın bu mükafatda ilk qələbəsi kimi qiymətləndirilir.

Roman oxucunu naməlum fəlakətdən sonra dəyişmiş gələcək İngiltərəyə aparır. Hadisələr Kent sahillərində cərəyan edir. Əsərin baş qəhrəmanı Filip Tennant və onun yaşlı xalası Marnie yeni dünyanın təhlükələri ilə mübarizə aparmağa çalışırlar. Onların qarşılaşdığı sirli, formasını dəyişə bilən varlıqlar isə hekayəyə fantastik və müəmmalı atmosfer qatır.

Münsiflər heyətinə tarixçi Meri Beard rəhbərlik edib. Romanın yekdilliklə seçilməsi onun həm mövzu, həm də bədii yanaşma baxımından fərqləndiyini göstərir. Münsiflər əsərdə qara yumorun, narahatedici mövzuların və gözlənilməz nikbinliyin bir araya gəlməsini xüsusi vurğulayıblar.

Altı onillikdən artıqdır ədəbiyyatla məşğul olan Harrison bu mükafata qədər də bir sıra nüfuzlu ədəbi təltiflərə layiq görülüb. O, Buker mükafatı ilə yanaşı, 50 min funt sterlinq pul mükafatı da qazanıb.

Bu nəticə yalnız bir yazıçının uğuru deyil, həm də fantastika janrının ciddi ədəbiyyatın ayrılmaz hissəsi kimi qəbul edilməsində mühüm hadisədir. Görünür, ədəbiyyatda gələcəyi təsvir edən əsərlər artıq təkcə fantastika həvəskarlarının deyil, ən nüfuzlu ədəbi münsiflərin də diqqət mərkəzindədir.

Nuri
Gundelik.az