Türkiyə Səudiyyə Ərəbistanında istehsal olunan elektrik enerjisinin İordaniya və Suriya üzərindən Türkiyəyə çatdırılmasını təmin edəcək böyükmiqyaslı elektrik ötürmə şəbəkəsi üzərində işləri davam etdirir. Layihənin Körfəz ölkələri ilə Türkiyə arasında yeni enerji bağlantısı yaratmaq və regional elektrik ticarətini inkişaf etdirmək potensialına malik olduğu bildirilir.
Enerji və Təbii Sərvətlər naziri Alparslan Bayraktar iyun ayında qatıldığı toplantıda regional enerji əməkdaşlığının gələcəkdə yarana biləcək böhranların qarşısının alınmasında mühüm həll yolu ola biləcəyini vurğulamışdı. Bayraktar avqustun 6-da iştirak etdiyi televiziya proqramında Səudiyyə Ərəbistanı ilə bu çərçivədə aparılan elektrik ötürmə layihəsi üzrə danışıqların davam etdiyini açıqlamışdı.
Bayraktarın sözlərinə görə, Səudiyyə Ərəbistanındakı elektrik enerjisinin İordaniya vasitəsilə Suriyaya, oradan isə Türkiyəyə çatdırılmasına imkan verəcək böyükmiqyaslı elektrik ötürmə şəbəkəsi üzərində iş aparılır. Enerjiyə tələbatın yüksək olması səbəbindən gələcəkdə Livanın da layihəyə qoşulmasının mümkün olduğu bildirilib.
Suriya ilə enerji əməkdaşlığı dəhlizin əsasını təşkil edir
Türkiyənin Suriya ilə enerji sahəsində əməkdaşlığı son iki ildə elektrik və təbii qaz infrastrukturunun yenidən qurulmasına yönəlmiş addımlarla sürətlənib.
Türkiyə 2017-ci ildən etibarən Suriyanın şimalındakı bölgələri elektrik enerjisi ilə təmin edir. Mövcud bağlantıların yeni ötürmə xətləri ilə genişləndirilməsi və elektrik ixracının artırılması planlaşdırılır. Təxminən 500 meqavat gücündə olan Birecik-Hələb elektrik ötürmə xəttinin yenidən istifadəyə verilməsi üçün də işlər aparılır.
Bundan başqa, Azərbaycandan Türkiyəyə daxil olan təbii qazın Kilis vasitəsilə Suriyaya çatdırılması üçün də çalışmalar başlanıb. Qazın Hələbdəki təbii qaz elektrik stansiyasında elektrik enerjisi istehsalında istifadə edilməsi planlaşdırılır.
Bayraktar Türkiyənin Suriya ilə neft, təbii qaz, elektrik enerjisi və mədənçilik sahələrində birgə layihələr həyata keçirdiyini bildirərək enerjini regional inkişaf və sabitliyin mühüm vasitələrindən biri kimi qiymətləndirib.
Türkiyə enerjidə regional mərkəz olmaq istəyir
Ember Türkiyə və Qafqazlar üzrə regional rəhbər Ufuk Alparslan Türkiyənin enerji resursları baxımından mühüm qovşaqda yerləşməsinə baxmayaraq, fosil yanacaqlarda xaricdən yüksək dərəcədə asılı olduğunu bildirib.
Onun sözlərinə görə, Türkiyənin təbii qaz və neft sahəsində “mərkəz ölkə” olmaqdan daha çox, istehsalçı ölkələri istehlak bazarları ilə birləşdirən tranzit ölkə olmaq potensialı ön plana çıxır.
Alparslan Türkiyədə elektrik istehsalında yerli mənbələrin payının 50 faizdən çox olduğunu və son dövrdə istifadəyə verilən yeni istehsal gücünün demək olar ki, hamısının bərpaolunan enerji mənbələrindən formalaşdığını qeyd edib.
O bildirib ki, Türkiyənin yüksək bərpaolunan enerji potensialı və elektrik sisteminin getdikcə daha çox təmiz enerjiyə əsaslanması ölkənin bərpaolunan enerjidə regional mərkəz olmaq hədəfini gücləndirir. Bu istiqamətdə elektrik sistemlərini bir-birinə bağlayan interkonneksiyalar mühüm rol oynayır.
Şərq-qərb istiqamətində geniş coğrafiyaya yayılan elektrik bağlantıları günəşin doğuş və batış vaxtlarındakı fərqlərdən yararlanmağa, günəş enerjisindən daha səmərəli istifadə etməyə imkan verir.
Alparslan həmçinin interkonneksiyaların elektrik sistemlərinin çevikliyini artırdığını, istehsal artıqlığının ixrac edilərək gəlir əldə edilməsinə şərait yaratdığını vurğulayıb.
Onun sözlərinə görə, Türkiyənin gələcək elektrik bağlantıları yalnız Yaxın Şərqlə məhdudlaşmır. Naxçıvan üzərindən Azərbaycan ərazisi ilə qurulacaq yeni elektrik bağlantıları və Azərbaycan vasitəsilə Mərkəzi Asiyaya uzanacaq əlaqələr Türkiyənin Avropa ilə Mərkəzi Asiya arasında daha geniş elektrik sisteminin mühüm qovşaqlarından birinə çevrilməsinə imkan verir.
Mənbə:TRT Haber
Hazırladı:Ziyalə Əhmədli
Gundelik.az
