ABŞ Federal Ehtiyat Sisteminin (FED) sentyabr ayında faiz dərəcələrini azalda biləcəyi ilə bağlı gözləntilərin artması fonunda qlobal maliyyə bazarlarında müsbət dinamika müşahidə olunur.
Gundelik.az xəbər verir ki, ötən həftə ABŞ-da açıqlanan zəif məşğulluq göstəricilərindən sonra bazarlarda satış təzyiqi artsa da, FED-in faiz endirimlərinə yaxınlaşması bu təzyiqi azaldaraq artım tendensiyası yaradıb.
Analitiklər bildirir ki, sentyabr ayında faizlərin azaldılması bazarlara dəstək ola bilər, lakin bunun inflyasiyanın artmasına səbəb olacağı ilə bağlı narahatlıqlar da qalmaqdadır.
FED sədri Cerom Pauell son çıxışında faiz dərəcələrinin iqtisadiyyatı zəiflədə biləcəyini və xüsusilə kiçik müəssisələrin işə götürmə planlarını ləngidə biləcəyini qeyd edib. San-Fransisko FED prezidenti Meri Deyli isə əmək bazarında zəifləmənin artdığını və inflyasiya ilə bağlı bərpa əlamətlərinin zəif olduğunu bildirib. Bu isə faiz endiriminin yaxın olduğunu göstərir.
İyun ayında ABŞ-da fabrik sifarişlərinin 4,8% azalması da iqtisadi zəifliyi təsdiqləyən göstəricilər sırasındadır. Digər tərəfdən, ABŞ prezidenti Donald Tramp Hindistanın Rusiyaya dəstəyinə görə bu ölkəyə qarşı gömrük tariflərini artıracağını açıqlayıb. Bu bəyanat Asiya bazarlarında narahatlıq yaradıb.
ABŞ və Avropa bazarlarında yüksəliş
“Tesla”nın rəhbəri İlon Maska böyük miqdarda bonus veriləcəyi xəbəri şirkətin səhmlərinin 2,19% artmasına səbəb olub. Palantir Technologies-in gəlirindəki 48%-lik artım şirkətin bazar dəyərini 1 trilyon dollar səviyyəsinə çatdırıb və səhmləri 4,1% bahalaşıb. Bu müsbət xəbərlərlə Dow Jones indeksi 1,34%, S&P 500 indeksi 1,47%, Nasdaq isə 1,95% artıb.
10 illik ABŞ xəzinədarlıq istiqrazlarının gəlirliliyi 4,20%-ə enib. Bu həftə ABŞ hökuməti 125 milyard dollar dəyərində istiqraz hərracları keçirəcək. Dollar indeksi isə 0,2% artaraq 98,8 bəndə çatıb.
Brent markalı neftin bir bareli 0,1% ucuzlaşaraq 68,5 dollar, qızılın bir unsiyası isə 0,1% azalaraq 3 372 dollar olub.
Avropada isə Sentix investor inam indeksi -3,7 səviyyəsinə düşsə də, bazarlarda yüksəliş qeydə alınıb. FTSE 100 (İngiltərə) 0,66%, DAX 40 (Almaniya) 1,42%, CAC 40 (Fransa) 1,14%, FTSE MIB 30 (İtaliya) isə 1,89% dəyər qazanıb.
Asiya və Türkiyə bazarlarında da artım qeydə alınıb
Nyu-York birjasındakı müsbət tendensiya Asiya bazarlarına da təsir edib. Nikkei 225 (Yaponiya) 0,6%, Hang Seng (Honq Konq) 0,4%, Şanxay Kompozit (Çin) 0,5%, Kospi (Cənubi Koreya) isə 1,4% artıb.
İstanbul Birjasında BIST 100 indeksi günü 0,99% artımla 10.853,49 bənddə tamamlayıb. BIST 30 indeksinə əsaslanan avqust fyuçers müqaviləsi 12.323 bənd səviyyəsində alınıb.
Dünnən USD/TRY məzənnəsi 0,1% artaraq 40,6565 səviyyəsində bağlanıb, bu gün isə 40,6805 səviyyəsindədir.
Türkiyədə iyul ayında istehlak qiymətləri 2,06%, istehsalçı qiymətləri isə 1,73% artıb. İllik inflyasiya isə müvafiq olaraq 33,52% və 24,19% təşkil edib.
Analitiklər BIST 100 indeksi üçün 11.000 və 11.100 bəndlərini müqavimət, 10.700 və 10.600 bəndlərini isə dəstək səviyyəsi kimi qeyd edirlər.
Qlobal və regional bazarlarda müsbət tendensiyanın davam etməsi investorların ümidlərini artırsa da, ticarət siyasətləri və inflyasiya ilə bağlı qeyri-müəyyənliklər diqqətlə izlənməkdədir.
Gundelik.az
