Qlobal bazarlar ABŞ və Çin rəsmilərinin barışdırıcı bəyanatları və risk iştahının artması fonunda həftəyə müsbət başlayıb. ABŞ Prezidenti Donald Tramp cümə günü verdiyi müsahibədə Çini hədələdiyi 100%-lik tarifin “davamsız” olduğunu bildirib və “Çinlə yaxşı münasibətdə olacağıq, lakin ədalətli razılaşma əldə edilməlidir” deyib. Tramp bir neçə həftə sonra Çin Dövlət Başçısı Şi Cinpinlə görüşəcəyini və hər iki tərəf üçün faydalı razılaşma əldə olunacağını bildirib.
Sinxua agentliyinin məlumatına görə, Çinin iqtisadi məsələlər üzrə baş nazirinin müavini Hi Lifinq ABŞ-ın maliyyə naziri Skott Bessent və ABŞ ticarət nümayəndəsi Ceymison Qri ilə videokonfransda görüşərək, iki ölkə arasında iqtisadi və ticarət məsləhətləşmələrinin yeni raundunun tezliklə keçirilməsi barədə razılığa gəlib.
ABŞ-da regional banklarla bağlı narahatlıqların azalması da qlobal risk iştahına müsbət təsir göstərib. Digər tərəfdən, Tramp noyabrın 1-dən idxal edilən orta və ağır yük maşınları, onların hissələri və avtobuslara tariflərin tətbiqini nəzərdə tutan bəyannamə imzalayıb.
ABŞ Mərkəzi Bankının (Fed) sədri Cey Powell bildirib ki, bankın balansının azaldılması prosesi yaxın aylarda tamamlanacaq. Bununla əlaqədar bazarlarda faiz dərəcələrinin bu ay və dekabrda 25 baz bənd azaldılması, 2026-cı ildə isə cəmi 3 baz bənd endiriləcəyi gözlənilir.
Geosiyasi proseslər də bazarları izləməyə davam etdirir. Kremlin mətbuat katibi Dmitri Peskov bildirib ki, Rusiyanın Prezidenti Vladimir Putin və ABŞ Prezidenti Donald Tramp iki həftə sonra Macarıstanda görüşəcək.
Qızıl qiyməti yeni həftəyə ucuzlaşaraq unsiyası 4,243 dollar səviyyəsində ticarət olunur. ABŞ-ın 10 illik istiqrazlarının faizi 4,02%, dollar indeksi 98,4 səviyyəsində stabildir. Brent nefti bir barel üçün 60,8 dollardan satılır.
ABŞ bazarları
Nyu-York birjasında regional banklarla bağlı narahatlıqların azalması ilə cümə günü müsbət tendensiya müşahidə olunub. Zions Bancorp və Western Alliance banklarının səhmləri müvafiq olaraq 6% və 3% artıb. Dow Jones Industrial Average 0,52%, S&P 500 indeksi 0,53%, Nasdaq indeksi isə 0,52% artıb.
Avropa bazarları
Avropada bazarlar ABŞ-da bank sektoruna dair narahatlıqlar fonunda ucuzlaşıb. Barclays və Deutsche Bankın səhmləri 5%-dən çox azalıb. Avrozonada illik inflyasiya sentyabrda 2,2% olub, İngiltərədə isə iqtisadiyyat avqustda 0,1% artıb. FTSE 100 indeksi 0,86%, CAC 40 indeksi 0,18%, FTSE MIB 30 indeksi 1,45%, Dax 40 indeksi isə 1,76% ucuzlaşıb.
Asiya bazarları
Yaponiyada siyasi qeyri-müəyyənliyin azalması və Çində iqtisadi göstəricilərin müsbət gəlməsi Asiya fond bazarlarında risk iştahını artırıb. Çinin üçüncü rüb ÜDM-i illik 4,8% artaraq gözləntiləri üstələyib. Sentyabrda əsas kapitala investisiyalar isə 0,5% azalıb.
Nəticədə, Nikkei 225 indeksi 2,7%, Şanxay Kompozit indeksi 0,7%, Honq Konq Hang Seng indeksi 2,4%, Cənubi Koreya Kospi indeksi isə 1,3% artıb.
Türkiyə bazarları
İstanbul Borsası BIST 100 indeksi cümə günü 1,56% azalaraq 10.208,76 bəndlə bağlanıb. USD/TRY isə 0,1% artımla 41,9490 səviyyəsində ticarət olunur. Türkiyə Mərkəzi Bankının sədri Fatih Karahan Vaşinqtonda BVF və Dünya Bankının illik toplantılarında inflyasiyanın azaldılması və qiymət sabitliyinin təmin edilməsi istiqamətində görülən tədbirlər barədə məlumat verib.
Beynəlxalq kredit reytinq agentliyi S&P Türkiyənin kredit reytinqini “BB-”, proqnozunu isə “stabil” səviyyəsində saxlayıb. Analitiklər bu gün xarici istehsalçı qiymət indeksi (ÜFE) və Avrozonada cari balans məlumatlarının izlənəcəyini bildiriblər. BIST 100-də 10.100 və 10.000 səviyyələri dəstək, 10.300 və 10.400 səviyyələri isə müqavimət nöqtələri kimi qiymətləndirilir.
Gundelik.az
