Atəşkəsə baxmayaraq, İsrail ordusu Qəzza zolağının mərkəzindəki Nusayrat və Meqazi qaçqın düşərgələrində atəş açıb, nəticədə biri uşaq olan iki fələstinli yaralanıb. Fələstin Qızıl Aypara Cəmiyyəti bildirib ki, İsrail əsgərləri Nusayrat Qaçqın Düşərgəsinin qərbində atəş açıblar və bir nəfər yaralanıb. Yaralı fələstinlinin Deyr əl-Bəlahdakı Əl-Əqsa Şəhidləri Xəstəxanasına köçürüldüyü bildirilir.
Yerli səhiyyə mənbələri Meqazi Qaçqın Düşərgəsinin şərqində yerləşən İsrail əsgərlərinin açdığı atəş nəticəsində gənc bir qızın yaralandığını bildirib. İsrail artilleriya bölmələrinin Deyr əl-Bəlahı və Xan Yunisin şərqindəki ərazini hədəf aldığı, Qəzza şəhərinin sahil və şimal-şərq hissələrinə dənizdən və qurudan da hücumlar edildiyi bildirilir.
İsrail ABŞ-ın dəstəyi ilə 8 oktyabr 2023-cü ildə Qəzzaya qarşı iki illik soyqırım müharibəsinə başladı. Bu hücumlar nəticəsində əksəriyyəti qadın və uşaqlardan ibarət təxminən 73.000 fələstinli həlak oldu, 173.000-dən çox insan yaralandı. Bundan əlavə, regionun infrastrukturunun 90%-i dağıdıldı. Haaretz” qəzetinin məlumatına görə, İsrail ordusu HƏMAS-ın yenidən güclənməsi bəhanəsi ilə Qəzzada genişmiqyaslı hücumlara hazırlaşır.
İsrail Baş Qərargah rəisi Eyal Zamir Qəzzaya quru hücumlarının bərpasının bir hissəsi olaraq Cənub Komandanlığı tərəfindən təqdim edilən hücum planlarını təsdiqlədi.
İsrail hərbi mənbələrinə görə, Cənub komandanı Yaniv Asor iddia edib ki, “Həması tərksilah edə bilən, etməyə hazır olan və ya həqiqətən qadir olan heç bir beynəlxalq təşkilat yoxdur və bu, nəticədə İsrail ordusunun Qəzzada böyük bir hücuma keçməsini zəruri edəcək”.
İsrailin yüksək rütbəli hərbi komandirləri Baş Qərargah rəisi Zamir tərəfindən təsdiqlənmiş hücum planlarının həyata keçirilməsini tələb etsə də, Asor qapalı görüşlərdə hücumların yalnız işğal olunmuş ərazilərlə məhdudlaşmayacağını da bildirib.Siyasi mənbələr qeyd edib ki, İsrail Baş naziri Binyamin Netanyahunun Qəzzanın işğalını 70 faizdən çox artırmaq barədə açıqlamalarına baxmayaraq, İsrail ordusu hələlik heç bir hücum planını təsdiqləməyib.
Belə bir hücum halında, İsrail ordusunun fələstinlilərin məcburi köçkün düşdüyü və həbs olunduğu Qəzza şəhərinin mərkəzindəki qaçqın düşərgələri də daxil olmaqla, sıx məskunlaşmış ərazilərə girəcəyi iddia edilir.
Hesabatda qeyd olunur ki, ABŞ Prezidenti Donald Trampın atəşkəs planının bir hissəsi olaraq 2025-ci ilin oktyabr ayında əldə edilən razılığa baxmayaraq, İsrail hələ də Fələstin texnokratlarından ibarət komitənin ərazini idarə etmək üçün Qəzzaya girməsinə icazə verməyib.
Mənbə:Anadolu Ajansı
Tərtib etdi:Səid Mikayılzadə
Gundelik.az
