Dünyanın ən böyük əyləncə və media şirkəti hesab edilən “Walt Disney Co.” 2025-ci maliyyə ilinin üçüncü rübündə xalis mənfəətini iki dəfə artıraraq bazar gözləntilərini xeyli üstələyib.
Bu barədə Gundelik.az şirkətə istinadən xəbər verir.
Şirkətin yaydığı məlumata əsasən, 28 iyunda başa çatan rübdə “Disney”in xalis mənfəəti 5,26 milyard dollar (bir səhmə görə 2,92 dollar) təşkil edib. Müqayisə üçün, ötən ilin eyni dövründə bu rəqəm 2,62 milyard dollar (bir səhmə görə 1,43 dollar) idi. Birdəfəlik məhsullar nəzərə alınmadan, düzəliş olunmuş mənfəət səhm başına 1,61 dollar olub.
Şirkətin ümumi gəliri 2% artaraq 23,65 milyard dollara çatıb. Müqayisə üçün, analitiklər orta hesabla 2,3 milyard dollar xalis mənfəət, səhm başına 1,45 dollar düzəliş olunmuş mənfəət və 23,7 milyard dollar gəlir gözləyirdilər.
Əsas bölmələr üzrə nəticələr belədir:
• Media və əyləncə bölməsi (Disney+, film studiyaları və s.) gəlirini 1% artıraraq 10,7 milyard dollara çatdırıb.
• Disney+ axın xidmətinin abunəçi sayı əvvəlki rüblə müqayisədə 1,8 milyon artaraq 128 milyona çatıb. Hər istifadəçidən orta aylıq gəlir 7,86 dollar olub (əvvəlki rübdə 7,77 dollar).
• Hulu və digər xidmətlərlə birlikdə ümumi ödənişli abunəçi sayı 2,6 milyon artaraq 183 milyona yüksəlib. Analitiklər cəmi 207 min artım gözləyirdilər.
• Əyləncə parkları, kruizlər, məhsul və oyun bölməsi 8% artımla 9,09 milyard dollar gəlir əldə edib (proqnoz: 8,4 milyard dollar).
• İdman mediası bölməsində isə gəlir 5% azalaraq 4,31 milyard dollara düşüb.
“Disney” cari maliyyə ili üçün düzəliş olunmuş mənfəət proqnozunu da artıraraq, bir səhmə görə 5,75-5,85 dollar aralığında olacağını bildirib. Bu, əvvəlki ilə nisbətən 18%-lik artım deməkdir.
Buna baxmayaraq, şirkətin səhmləri çərşənbə günü premarket ticarətində 2,2% ucuzlaşıb. Bununla belə, il ərzində ümumi artım 6,3% təşkil edib.
Gundelik.az