Keir Starmer bildirib ki, Böyük Britaniya ABŞ-ın İranın raket obyektlərinə qarşı “müdafiə xarakterli” zərbələr endirməsi üçün Britaniya hərbi bazalarından istifadə etməsinə razılıq verib.
Lakin baş nazir deyib ki, Böyük Britaniya “İraq səhvlərindən” dərs çıxarıb, İrana qarşı ilkin hücumlarda iştirak etməyib və “hazırda hücum xarakterli əməliyyatlara qoşulmayacaq”.
BBC-nin məlumatına görə, ABŞ-ın İranın raket obyektlərinə zərbələr endirmək üçün Qlosterşirdə yerləşən RAF Fairford və Hind okeanındakı Diego Garcia bazalarından istifadə etməsi ehtimal olunur.
Baş nazir bu açıqlamanı bazar günü gecə Kiprdə yerləşən Britaniyanın RAF Akrotiri bazasına pilotsuz uçuş aparatı ilə hücum edildikdən bir neçə saat sonra verib. Hadisə nəticəsində xəsarət alan olmayıb, araşdırmalar davam edir.
Hücum yerli vaxtla gecə yarısı (22:00 GMT) baş verib. Böyük Britaniyanın Müdafiə Nazirliyi bazaya “minimal ziyan” dəydiyini açıqlayıb.
Bazar günü yayımlanan video bəyanatında Starmer bildirib ki, qərar müttəfiqlərin “kollektiv özünümüdafiəsi” və Britaniya vətəndaşlarının qorunması əsasında qəbul edilib. O, İranı “yandırılmış torpaq strategiyası” yürütməkdə ittiham edib.
Baş nazir əlavə edib ki, ABŞ Britaniya bazalarından İranın raketlərini “mənbəyində” — anbarlarda və ya buraxılış qurğularında məhv etmək üçün “konkret və məhdud müdafiə məqsədi” ilə istifadə edəcək.
O bildirib ki, bu addım beynəlxalq hüquqa uyğundur və hökumət hüquqi rəyin xülasəsini dərc edib.
Müxalif Mühafizəkarlar Partiyasının lideri Kemi Badenoch hökuməti İranla bağlı daha sərt mövqe tutmaqdan “qorxmaqda” ittiham edib.
Liberal Demokratların lideri Ed Davey isə deyib ki, “Böyük Britaniya qeyri-qanuni hərbi əməliyyata şərik olmamalıdır” və ABŞ-a bazalardan istifadə icazəsi verilməsi məsələsində deputatlara söz verilməsini tələb edib.
ABŞ Prezidenti Donald Trump bildirib ki, İran “razılaşma əldə etməsə”, RAF Fairford və Diego Garcia bazalarından istifadə “zəruri ola bilər”. Hər iki baza əvvəllər də ABŞ tərəfindən uzaqmənzilli bombardman əməliyyatları üçün istifadə olunub.
Reform UK partiyasının lideri Nigel Farage qərarı “heç olmasa gec də olsa doğru addım” adlandırıb. Yaşıllar Partiyasının lideri Zack Polanski isə bu addımı “Yaxın Şərqdə növbəti qeyri-qanuni müharibəyə qoşulmaq” kimi qiymətləndirib.
ABŞ və İsrail şənbə günü səhər tezdən İrana hücumlara başlayıb. İran hakimiyyəti isə regionda ABŞ hərbi mövcudluğu olan ölkələrə – Bəhreyn, Qətər, BƏƏ, Küveyt və İraqa qarşı cavab zərbələri endirib.
Starmer bildirib ki, Böyük Britaniya təyyarələri regionda müttəfiqləri və vətəndaşları qorumaq üçün müdafiə əməliyyatlarında iştirak edir, lakin İrana qarşı zərbələrdə “heç bir rol oynamayıb”.
Onun sözlərinə görə, regionda – daimi sakinlər, turistlər və tranzit sərnişinlər daxil olmaqla – azı 200 min Britaniya vətəndaşı var və hökumət onları dəstəkləmək üçün əlindən gələni edəcək.
Xarici İşlər Nazirliyi Bəhreyn, İsrail, Küveyt, Fələstin əraziləri, Qətər və BƏƏ-də olan Britaniya vətəndaşlarına qeydiyyatdan keçməyi tövsiyə edib ki, yeniliklər barədə məlumat ala bilsinlər.
Mənbə: BBC
Hazırladı: Ziyalə Əhmədli
Gundelik.az
