Elm dünyasında uzun müddətdir qəbul edilən “daha çox hərəkət et, daha az otur” tövsiyəsi artıq daha konkret yanaşma ilə əvəz olunur. European Heart jurnalında dərc olunan araşdırma göstərib ki, gündəlik fiziki fəaliyyətin cəmi kiçik bir hissəsini belə yüksək intensivlikli hərəkətlərə ayırmaq səkkiz müxtəlif xroniki xəstəliyin riskini əhəmiyyətli dərəcədə azaldır.
Tədqiqatçılar Böyük Britaniyanın UK Biobank məlumat bazasından istifadə edərək təxminən 470 min insanın fiziki fəaliyyətini 9 il ərzində izləyiblər.
Nəticələr göstərib ki, ümumi fiziki fəaliyyətinin yalnız 4 faizini yüksək intensivlikli məşqlərə sərf edən şəxslər, belə fəaliyyət göstərməyənlərlə müqayisədə xeyli daha sağlam olublar.
Risklərin azalması
Yüksək intensivlikli fiziki fəaliyyət aşağıdakı risklərin azalması ilə əlaqələndirilib:
Demensiya (ağıl zəifliyi) – 63%
2-ci tip diabet – 60%
Qaraciyərin piylənməsi (yağlı qaraciyər xəstəliyi) – 48%
Bütün səbəblərdən ölüm riski – 46%
Xroniki tənəffüs yolu xəstəlikləri – 44%
Xroniki böyrək xəstəliyi – 41%
İmmunitet sistemi xəstəlikləri – 39%
Ürək-damar hadisələri – 31%
Atriyal fibrilyasiya (ürək ritm pozğunluğu) – 29%
“Yüksək intensivlik” nə deməkdir?
Bir fəaliyyətin yüksək intensivlikli olub-olmadığını müəyyən etməyin ən sadə yolu “danışıq testi”dir.
Əgər məşq zamanı rahat şəkildə tam cümlələr qura bilirsinizsə, fəaliyyət aşağı və ya orta intensivlikli hesab olunur.
Əgər yalnız bir neçə söz deyə biləcək qədər nəfəsiniz çatırsa, bu artıq yüksək intensivlikli fəaliyyətdir.
Qaçış, sürətli velosiped sürmə, pilləkənləri tempolu şəkildə qalxmaq və ya ağır alış-veriş torbalarını yuxarı mərtəbəyə daşımaq buna nümunədir.
Gündəlik həyata necə daxil etmək olar?
Mütəxəssislər bildirirlər ki, bu faydalardan yararlanmaq üçün peşəkar idmançı olmaq lazım deyil. Gün ərzində cəmi bir neçə dəqiqəlik intensiv fəaliyyət belə müsbət təsir göstərir.
Qısa intensiv hərəkətlər: Lift əvəzinə pilləkənləri sürətlə qalxın.
Sürətli yeriş: İşə və ya mağazaya gedərkən addımlarınızı sürətləndirin.
İnterval məşqlər: Gəzinti və ya üzgüçülük zamanı 30 saniyə–1 dəqiqə ərzində tempi maksimum artırıb, sonra yenidən yavaşıdın.
Yaşlı insanlar və ya hərəkət məhdudiyyəti olan şəxslər üçün “yüksək intensivlik” anlayışı fərqlidir. Məsələn, onlar üçün stuldan sürətlə qalxıb yenidən oturmaq belə yüksək intensivlikli fəaliyyət sayılır.
Mütəxəssislər hər hansı yeni məşq proqramına başlamazdan əvvəl həkimlə məsləhətləşməyi tövsiyə edirlər.
Mənbə:TRT Haber
Hazırladı:Ziyalə Əhmədli
Gundelik.az
