Burun tıxanıqlığı 7-dən 70-ə hər kəsin tez-tez yaşadığı sağlamlıq problemlərindən biridir. Xüsusilə körpələrdə burun tıxanıqlığı yalnız nəfəs almağı deyil, həm də yuxu və qidalanma rejimini təsir edir. Yenidoğulmuş dövrdə isə bu vəziyyət inkişafı birbaşa çətinləşdirə bilər. Sadə görünən bir tıxanıqlıq əslində ciddi nəticələr doğurur.
Burun tıxanıqlığı yalnız nəfəs almağı çətinləşdirmir; yuxuya, qidalanmaya və hətta böyüməyə də təsir edə bilər.
Körpə yaxşı yata bilməzsə narahat olur, yaxşı qidalana bilməzsə tez yorulur. Yəni bəzən problem sadəcə kiçik görünən bir burun tıxanıqlığından ibarətdir.
Xüsusilə yeni doğulmuş dövrdə körpələr əsasən burunla nəfəs alırlar. Buna görə tıxanıqlıq olduqda nəfəs almaq çətinləşir.
Uşaq Sağlamlığı və Xəstəlikləri üzrə mütəxəssis Uzm. Dr. Dicle Çelik körpələrdə burun tıxanıqlığının düşündüyümüzdən daha ciddi nəticələrə səbəb ola biləcəyini bildirir.
Serum fizioloji dərman deyil
Serum fizioloji istifadəsi barədə məlumat verən həkim bildirir ki, bu maddə dərman deyil və ehtiyac olduqda təhlükəsiz şəkildə istifadə oluna bilər.
“Serum fizioloji əslində dərman deyil. Bədən mayeləri ilə uyğun miqdarda duz ehtiva edən steril məhluldur. Buna görə toxumaları qıcıqlandırmadan istifadə olunur.
Xüsusilə burun tıxanıqlığında, soyuqdəymə dövrlərində, quru hava səbəbilə burun selikli qişasının quruduğu hallarda və burun içində qabıqlanma olduqda ifrazatın yumşalmasına və təmizlənməsinə kömək edir.”
Əsas olan təkcə istifadə yox, düzgün tətbiqdir
Həkim burun təmizliyində düzgün tətbiqin vacibliyini vurğulayır:
“Əsas olan təkcə serum fizioloji istifadə etmək deyil, onu necə tətbiq etməkdir. Tətbiq yumşaq və nəzarətli şəkildə olmalıdır. Qəfil və yüksək təzyiqlə edilən tətbiqlər körpəni narahat edir. Lazım gəldikdə yumşalmış ifrazatlar burun aspiratoru ilə ehtiyatla təmizlənir.”
Evdə hazırlanan məhlullar və kran suyu ilə bağlı xəbərdarlıq
Evdə hazırlanmış duzlu su qarışıqları risklidir. Duz nisbəti düzgün olmazsa burunda quruluq, qıcıqlanma və ya tıxanıqlığın artmasına səbəb olur. Bundan əlavə, steril olmadığı üçün infeksiya riski daşıyır.
Digər vacib məqam isə kran suyudur. İçməli olsa belə, burun üçün uyğun deyil. Həssas burun quruluşunda infeksiya, sinüzit və qulaq problemlərinə yol açır.
“Kran suyu istifadə olunmamalıdır”
Mütəxəssislərə görə, burun tıxanıqlığı uzun müddət davam edirsə, bu vəziyyət yüngül qəbul edilməməlidir. Orta qulaq iltihabı, sinüzit və aşağı tənəffüs yolları infeksiyalarına qədər irəliləyə bilər. Belə hallarda mütləq həkimə müraciət edilməlidir.
Mənbə:CNN
Hazırladı:Ziyalə Əhmədli
Gundelik.az
