Avstraliyada koalaların nəslinin tükənməsi təhlükəsini artıran xlamidiya epidemiyasına qarşı hazırlanmış ilk peyvənd təsdiq olunub. Alimlərin sözlərinə görə, bu peyvənd ölüm hallarını 65 faizədək azalda və minlərlə heyvanın həyatını xilas edə bilər.
Gundelik.az xəbər verir ki, Sunshine Coast Universitetinin (UniSC) mütəxəssisləri 10 ildən artıqdır bu peyvənd üzərində çalışır.
Tədqiqatçılar bildirirlər ki, bəzi bölgələrdə infeksiya koalaların 70 faizinə qədər yayılıb və koloniyalar hər gün məhv olmaq təhlükəsi ilə üzləşir. “Bu, çox həyəcanlı gündür. Bəzən ümidimizi itirirdik, amma nəhayət, bacardıq”, – deyə mikrobioloq Piter Timms bildirib.
Xlamidiya koalalar arasında cütləşmə və yaxın təmas vasitəsilə yayılır. Sidik yollarının iltihabına, korluğa, sonsuzluğa və çox vaxt ölümlə nəticələnən ağır fəsadlara səbəb olur. Müalicədə istifadə edilən antibiotiklər isə koalaların bağırsaq florasını məhv edərək onların əsas qida mənbəyi olan evkalipt yarpaqlarını həzm etməsinə mane olur.
Yeni peyvənd 10 il ərzində yüzlərlə vəhşi koala üzərində sınaqdan keçirilib. Nəticələr göstərib ki, preparat ölüm hallarını azı 65 faiz azaldır və çoxalma mövsümündə xəstəliyin əlamətlərini xeyli zəiflədir.
Son illərdə meşələrin qırılması, yanğınlar, şəhərləşmə və digər təhdidlər səbəbindən koalaların sayı sürətlə azalıb. Lakin ən böyük təhlükə ölümlərin təxminən yarısına səbəb olan xlamidiya epidemiyasıdır. Hazırda Avstraliyada təxminən 50 min koalanın qaldığı bildirilir.
Alimlər peyvəndin gələn ildən etibarən xüsusilə risk altında olan koloniyalarda və vəhşi təbiət xəstəxanalarında pulsuz tətbiq ediləcəyini gözləyirlər. Bununla belə, vəhşi koalaların tutulması və peyvənd olunması yüksək maliyyət tələb edir.
Avstraliyanın ətraf mühit naziri Murray Watt peyvəndin “gələcək nəsillərin də vəhşi təbiətdə koalaları görə bilməsini təmin edəcəyini” deyib. Yeni Cənubi Uels əyalət hökuməti isə bu həftə 176 min hektar ərazidə yeni təbiət qoruğu yaradılacağını və “Böyük Koala Milli Parkı”nın təxminən 12 min koalanı qoruyacağını açıqlayıb.
Gundelik.az
