ABŞ prezidentinin xüsusi elçisi Stiv Uitkoff çərşənbə günü açıqlamasında Vaşinqtonun Tehrana qarşı sanksiyaların mümkün bərpası fonunda İranla dialoqu davam etdirdiyini bildirib.
Bu barədə Gundelik.az xarici mediaya istinadən xəbər verir.
Nyu-Yorkda BMT Baş Assambleyasının sessiyası ilə paralel keçirilən Concordia sammitində çıxış edən Uitkoff qeyd edib: “İranla bağlı biz danışıqlar aparırıq. Kimlə danışmaq lazımdırsa, danışıqlar aparırıq. Bu, bizim işimizdir – problemləri diplomatik yolla həll etmək”.
Onun sözlərinə görə, ABŞ qalıcı həll yolunun tapılmasına və sanksiyaların bərpası məsələsində razılığa nail olmağa çalışır. “Əgər bunu edə bilməsək, sanksiyalar lazım olduğu kimi tətbiq olunacaq. Bu, baş verənlərə uyğun dərmandır”, – deyə xüsusi nümayəndə vurğulayıb.
Uitkoff həmçinin bildirib ki, ABŞ-nin məqsədi İrana zərər vurmaq deyil. Lakin onun sözlərinə görə, Böyük Britaniya, Fransa və Almaniyanın avqustun 28-də 2015-ci il Birgə Hərtərəfli Fəaliyyət Planına əsasən sanksiyaların bərpası mexanizmini işə salmaq təşəbbüsündən sonra Tehran çətin vəziyyətə düşüb.
Gundelik.az
