Turşuların seçilməsi, pilinqin dərinliyi, piqmentasiya riski və bərpa prosesi
Daha hamar, parlaq və ləkəsiz dəriyə sahib olmaq istəyənlərin müraciət etdiyi prosedurlardan biri də kimyəvi pilinqdir. Dərinin yenilənməsinə, bəzi sızanaq izlərinin və piqment ləkələrinin görünüşünün azalmasına kömək edən bu üsul estetik kosmetologiyada geniş istifadə olunur. Lakin prosedurdan sonra dərinin soyulması hər zaman uğurlu nəticənin göstəricisidirmi? Daha güclü turşu və daha dərin pilinq daha yaxşı effekt verirmi?
Kimyəvi pilinq zamanı istifadə olunan turşunun növü, konsentrasiyası, dəridə qalma müddəti və təsir dərinliyi nəticəyə birbaşa təsir göstərir. Yanlış seçim isə dərinin həddindən artıq qıcıqlanmasına, piqment ləkələrinin yaranmasına və hətta çapıqlara səbəb ola bilər. Xüsusilə həssas və piqmentasiyaya meyilli dərilərdə prosedurun fərdi xüsusiyyətlər nəzərə alınmaqla aparılması vacibdir.
Maraqlıdır, kimyəvi pilinq hansı hallarda faydalıdır, turşular necə seçilməlidir və prosedurdan sonra dərinin soyulması nə dərəcədə normaldır? Bərpa dövründə hansı qaydalara əməl etmək lazımdır ki, arzulanan nəticənin əvəzinə əlavə dəri problemləri yaranmasın?
Mövzu ilə bağlı estetik cərrah, dermatoloq və trixoloq Səma Məmmədli Gundelik.az-a açıqlamasında kimyəvi pilinqin təsir mexanizmi, prosedur seçimi və mümkün riskləri barədə fikirlərini bölüşüb.
“Kimyəvi pilinq dərinin üst qatında nəzarətli yenilənmə yaratmaq məqsədilə tətbiq olunan prosedurdur. Dərinin teksturasını yaxşılaşdırmaq, bəzi sızanaq izlərinin və piqment ləkələrinin görünüşünü azaltmaq, dəri tonunu daha bərabər hala gətirmək üçün istifadə oluna bilər. Lakin burada əsas məsələ dərini nə qədər soymaq deyil, onun ehtiyacına uyğun prosedur seçməkdir. Dərinin soyulması həmişə yaxşı nəticənin əlaməti deyil. Bəzi səthi pilinqlərdən sonra yüngül qabıqlanma müşahidə olunur, bəzilərində isə nəzərəçarpan soyulma olmadan da faydalı nəticə əldə edilə bilər. Soyulmanın çox olması prosedurun daha effektiv olduğunu göstərmir. Əksinə, güclü yanma, artan ağrı, qabarcıqlar və həddindən artıq qızartı dərinin zədələnməsinə işarə edə bilər. Turşuların seçimi dəri tipinə, mövcud problemə və arzulanan nəticəyə əsaslanmalıdır. Məsələn, qlikolik və laktik turşular səthi yenilənmə məqsədilə, salisil turşusu isə müəyyən sızanaqlı və yağlı dəri problemlərində istifadə oluna bilər. Ancaq turşunun adı ilə yanaşı, konsentrasiyası, formulun xüsusiyyətləri və tətbiq qaydası da böyük əhəmiyyət daşıyır. Eyni turşu fərqli konsentrasiyalarda və müxtəlif tətbiq şəraitində tamamilə fərqli təsir göstərə bilər”.
Pilinqin dərinliyi artdıqca nəticə daha nəzərəçarpan ola bilər, lakin fəsad riski də yüksəlir. Buna görə daha dərin pilinqin hər zaman daha yaxşı seçim olduğunu düşünmək yanlışdır. Bəzi hallarda səthi prosedurların mərhələli şəkildə aparılması daha uyğun yanaşma ola bilər. Piqmentasiya riski də xüsusi diqqət tələb edir. Dəri zədələndikdə və ya həddindən artıq qıcıqlandıqda, xüsusilə piqmentasiyaya meyilli insanlarda tünd ləkələr yarana bilər. Günəş şüalarından qorunmamaq bu riski artıra bilər. Buna görə prosedurdan əvvəl dərinin vəziyyəti qiymətləndirilməli, uyğun pilinq seçilməli və sonrakı qulluq qaydalarına ciddi əməl olunmalıdır. Bərpa dövründə dərini qaşımaq, qabıqları qoparmaq, sərt skrablardan və qıcıqlandırıcı aktiv maddələrdən istifadə etmək olmaz. Dərinin baryerini qoruyan nəmləndirici vasitələrdən istifadə etmək və günəşdən qoruyucu məhsul tətbiq etmək vacibdir. Bərpa müddəti pilinqin dərinliyindən asılı olaraq dəyişir. Kimyəvi pilinqi ev şəraitində, xüsusilə yüksək konsentrasiyalı turşularla özbaşına tətbiq etmək təhlükəli ola bilər. Dərinin xüsusiyyətləri düzgün qiymətləndirilmədikdə yanıq, uzunmüddətli qızartı, piqmentasiya və çapıq kimi problemlər yarana bilər. Mənim tövsiyəm odur ki, pilinq seçərkən yalnız prosedurun adını və ya başqalarında yaratdığı nəticəni əsas götürməyin. Hər dərinin ehtiyacı fərqlidir. Əsas məqsəd dərini mümkün qədər çox soymaq deyil, onun sağlamlığını qoruyaraq istənilən nəticəyə təhlükəsiz şəkildə nail olmaqdır”.
Nurəddin Abdullayev
Gundelik.az
