Cənubi Koreya hakimiyyəti məşhur aktyor Kim Soo-hyun haqqında böhtan xarakterli iddialar yaymaqda ittiham olunan YouTuber Kim Se-ui-ni həbs edib. Bu iddialar ölkənin ən tanınmış aktyorlarından biri olan Kim Soo-hyunun karyerasının dayanmasına səbəb olmuşdu.
Polis və prokurorluğun iddiasına görə, Kim Se-ui idarə etdiyi Hover Lab adlı populyar YouTube kanalında sübutları saxtalaşdıraraq Kim Soo-hyunun bir aktrisa ilə onun azyaşlı olduğu dövrdə münasibətdə olduğunu irəli sürüb. Aktyor isə bu ittihamları hər zaman rədd edib.
Seoul Central District Court çərşənbə axşamı günü YouTuberin həbsinə order verib. Məhkəmə qərarında onun sübutları məhv edə və ya ölkədən qaça biləcəyi ehtimalının nəzərə alındığı bildirilib.
Çərşənbə günü Kim Soo-hyunun agentliyi yaydığı açıqlamada bildirib ki, “həqiqət sübut olunub”.
Açıqlamada deyilir: “İstintaq Hover Lab-ın Kim Soo-hyuna qarşı irəli sürdüyü bütün şübhə və ittihamların əsassız olduğunu təsdiqlədi.” Agentlik həmçinin bu müddət ərzində aktyoru dəstəkləyən insanlara təşəkkür edib.
Məhkəmənin qərarından əvvəl jurnalistlərə danışan Kim Se-ui ittihamları rədd edərək bildirib ki, həbs orderi üçün təqdim olunan materiallarda “ən əsas faktlar belə düzgün şəkildə ortaya qoyulmayıb”.
O, həbs tələbi ilə çıxış edən polis və prokurorluq əməkdaşlarından şikayət edəcəyini də söyləyib.
Qalmaqal ötən il aktrisa Kim Sae-ron-un 24 yaşında intihar etməsindən qısa müddət sonra başlayıb.
Aktrisanın ölümündən bir neçə ay sonra Hover Lab kanalı onun səsinin eşidildiyi bir audioyazı yayımlayıb. Həmin səs yazısında Kim Sae-ronun Kim Soo-hyunla orta məktəb illərindən münasibətdə olduğunu dediyi iddia edilirdi.
Lakin polis həmin audioyazının süni intellekt vasitəsilə yaradıldığını bildirib.
Hüquq-mühafizə orqanları həmçinin YouTuberin aktrisanın telefonundan göndərildiyi iddia olunan mesajların ekran görüntülərini də manipulyasiya etdiyini və bununla Kim Sae-ronun Kim Soo-hyunla yazışdığını göstərməyə çalışdığını qeyd edib.
Hover Lab Cənubi Koreyada mübahisəli kanal kimi tanınır. Kanal tez-tez siyasət və əyləncə dünyası ilə bağlı şərhlər və məşhurlar haqqında xəbərlər paylaşır.
Kim Soo-hyun Cənubi Koreyanın ən məşhur televiziya ulduzlarından biridir və ölkədə çoxsaylı məşhur seriallarda rol alıb, həmçinin reklam kampaniyalarının siması olub. Buna görə də ittihamlar ölkədə böyük rezonans doğurmuşdu.
Polisin məhkəməyə təqdim etdiyi sənədlərdə qeyd olunur ki, Hover Lab tərəfindən yayılan iddialar “Kim Soo-hyunun sosial nüfuzunu və iqtisadi fəaliyyətlərini tamamilə çökdürüb, peşəkar fəaliyyətini davam etdirməsinin əsaslarını məhv edib”.
Polis həmçinin aktyorun hələ də psixoloji müalicə aldığını bildirib.
Kim Soo-hyun 2025-ci ilin mart ayında keçirdiyi gözyaşları içində mətbuat konfransından sonra ictimaiyyət qarşısında rəsmi çıxış etməyib. Həmin konfransda o, Kim Sae-ronla bir il münasibətdə olduğunu, lakin bunun yalnız aktrisa yetkinlik yaşına çatdıqdan sonra baş verdiyini söyləmişdi.
“Etmədiyim bir şeyi etiraf edə bilmərəm,” – deyə aktyor bildirmişdi.
O, həmin ay YouTuberə və aktrisanın ailəsinə qarşı yalan ittihamlar yaydıqları iddiası ilə cinayət və mülki iddialar qaldırmışdı.
Kim Soo-hyunun agentliyi son açıqlamasında ötən ilki mətbuat konfransına da toxunub:
“Bir il əvvəl Kim Soo-hyun demişdi: ‘Məndən mənə inanmağınızı istəmirəm. Mən bunu mütləq sübut edəcəyəm.’”
Açıqlamada vurğulanıb ki, “ötən bir il məhz bu vədi yerinə yetirmək üçün sərf olunub.”
Mənbə:BBC
Hazırladı:Ziyalə Əhmədli
Gundelik.az
