Gəzərkən yaranan ayaq ağrısı, keyimə və gücsüzlük hər zaman yaşlanmanın təbii nəticəsi deyil. Xüsusilə müəyyən məsafədən sonra dayanıb dincəlmək ehtiyacı yaranırsa və oturanda və ya önə əyiləndə şikayətlər azalırsa, səbəb bel nahiyəsində onurğa kanalının daralması ola bilər.
Ortopediya və Travmatologiya mütəxəssisi Prof. Dr. Engin Çetin bildirib ki, yaşla əlaqədar onurğada baş verən degenerativ dəyişikliklər onurğa beyni və sinirlərin keçdiyi kanalın daralmasına, nəticədə sinirlərə təzyiq yaranmasına səbəb olur.
Əsas əlamətlər
Bel nahiyəsində kanal daralması zamanı:
Gəzərkən artan ayaq ağrısı
Ayaqlarda keyimə və qarışqa gəzməsi hissi
Ayaqlarda gücsüzlük
Müəyyən məsafədən sonra dayanıb dincəlmək ehtiyacı
Oturanda və ya önə əyiləndə rahatlama müşahidə olunur.
Mütəxəssis qeyd edib ki, yeriş məsafəsinin tədricən azalması xüsusilə əvvəllər rahat yeriyən insanlarda diqqətdən kənarda qalmamalıdır. Ayaqlarda güc itkisi, tez-tez büdrəmə, yıxılma və tarazlıq problemləri də varsa, nevroloji müayinə aparılmalıdır.
Hər kanal daralması əməliyyat demək deyil
Həkim vurğulayıb ki, kanal daralması diaqnozu qoyulan hər xəstəyə cərrahi müdaxilə lazım deyil. Müalicə yalnız MRT nəticəsinə əsasən müəyyən edilmir. Xəstənin şikayətləri, yeriş qabiliyyəti, gündəlik həyata təsiri və nevroloji müayinə nəticələri birlikdə qiymətləndirilir.
Yüngül və orta dərəcəli hallarda fiziki müalicə, məşq proqramları, çəkiyə nəzarət, gündəlik vərdişlərin tənzimlənməsi və uyğun dərman müalicəsi tətbiq olunur. Bəzi hallarda inyeksiya müalicəsi də nəzərdən keçirilir.
Müalicəyə baxmayaraq şikayətlər davam edərsə, həyat keyfiyyətini ciddi şəkildə aşağı salarsa və ya sinir funksiyalarında proqressiv itki yaranarsa, əməliyyat gündəmə gəlir.
Mütəxəssis həmçinin bildirib ki, hər xəstədə avtomatik olaraq vida və füzyon əməliyyatı aparılması düzgün yanaşma deyil. Bəzi xəstələrdə yalnız sinirlər üzərindəki təzyiqin aradan qaldırılması — dekompressiya kifayət edir.
Yeriş məsafəsinin azalmasını sadəcə yaşlanma ilə əlaqələndirmək olmaz. Xüsusilə yeridikcə artan ayaq ağrısı, keyimə və gücsüzlük varsa, onurğa kanalının daralması baxımından həkim müayinəsindən keçmək vacibdir.
Mənbə:CNN Türk
Hazırladı:Ziyalə Əhmədli
Gundelik.az
