Yaponiya müdafiə naziri bildirib ki, ölkə 2031-ci ilin martına qədər Tayvan yaxınlığında yerləşən uzaq qərb adasında – Yonaguni adasında – hava hücumundan müdafiə raketləri yerləşdirməyi planlaşdırır. Bu, 2022-ci ildə elan edildikdən sonra raketlərin yerləşdirilməsi üçün konkret vaxt qrafikinin ilk dəfə açıqlanmasıdır.
Çin özünü idarə edən Tayvanı öz ərazisi hesab edir və onu “yenidən birləşdirmək” üçün güc tətbiq etməyi istisna etmir. Yonaguni adası aydın havada Tayvan sahillərindən görünür və yalnız 110 km məsafədə yerləşir.
Yaponiya ilə Çin arasında gərginliklər noyabr ayından bəri artıb. O vaxt baş nazir Sanae Takaichi Tayvana hücum edilərsə, Yaponiyanın özünümüdafiə qüvvələrini işə sala biləcəyini demişdi. Narahatlıq ondan ibarətdir ki, Tayvana hər hansı hücum ABŞ ilə Çin arasında birbaşa hərbi qarşıdurmaya səbəb ola və daha sonra Yaponiya kimi ABŞ müttəfiqlərini də cəlb edə bilər.
Takaichi’nin parlamentdəki açıqlamaları Çinlə münasibətləri son illərin ən aşağı səviyyəsinə endirib. Pekin isə təzyiqləri artıraraq müharibə gəmiləri göndərib, nadir torpaq elementlərinin ixracını məhdudlaşdırıb, Çin turizmini azaldıb, konsertləri ləğv edib və hətta pandalarını geri çağırıb.
Müdafiə naziri Şincirō Koidzumi raketlərin yerləşdirilməsi vaxtını çərşənbə axşamı açıqlayıb. Bu, Çinin milli təhlükəsizlik səbəbilə 20 yapon şirkətinə ixrac məhdudiyyəti tətbiq etməsindən bir gün sonra baş verib.
Koidzumi bildirib ki, Yonaguni bölməsi daxil olan təyyarələri və raketləri ələ keçirə bilən orta mənzilli hava hücumundan müdafiə raketləri ilə təchiz olunacaq.
Çin Koidzumi’nin açıqlamasına hələ reaksiya verməyib. Lakin nazirin noyabrda adaya səfəri zamanı Pekin Yaponiyanı “regional gərginlik yaratmaq və hərbi qarşıdurmaya təhrik etməkdə” ittiham etmişdi. Bir neçə gün sonra isə narazılığını göstərmək üçün adanın yaxınlığında pilotsuz uçuş aparatları uçurmuş və Yaponiya qırıcı təyyarələri havaya qaldırmışdı.
Bu hadisələr Takaichi’nin bu ay keçirilən parlament seçkilərində böyük qələbə qazanmasından sonra baş verib. Bu qələbə ona Yaponiyanın müdafiə imkanlarını daha da gücləndirmək üçün siyasi imkan yaradıb.
Yonaguni ilə bağlı elan sadəcə hərbi dəyişiklik deyil, daha iddialı və sərt bir Tokio siyasətinin başlanğıcı kimi görünür. Bu, Yaponiyanın öz “ön cəbhəsini” harada gördüyünü və onu müdafiə etmək üçün nə qədər irəli getməyə hazır olduğunu göstərir.
Son on ildə Yaponiya əvvəllər sakit olan Yonaguni adasını hərbi bazaya çevirib. Hazırda burada sahil müşahidəsi aparılır və təxminən 160 özünümüdafiə qüvvələri üzvü xidmət edir.
Düşmən rabitəsini və radar sistemlərini pozmaq qabiliyyətinə malik elektron müharibə bölməsi 2026 maliyyə ilində (apreldən növbəti ilin martına qədər) yaradılacaq.
Koidzumi bildirib ki, raket bölməsinin yerləşdirilməsi vaxtı gələcək infrastruktur işlərinin gedişindən asılı olaraq dəyişə bilər, lakin hazırkı plan 2030 maliyyə ilini nəzərdə tutur.
Mənbə: BBC
Hazırladı: Ziyalə Əhmədli
Gundelik.az
