Fiziki Təbabət və Reabilitasiya üzrə mütəxəssis, professor İrfan Koca bildirib ki, erkən diaqnoz və xəstəyə uyğun fərdi şəkildə planlaşdırılan kompleks müalicə yanaşması xəstələrin həyat keyfiyyətini əhəmiyyətli dərəcədə yaxşılaşdırır.
Onun sözlərinə görə, xüsusilə gənc kişilərdə rast gəlinən, səhər saatlarında daha qabarıq hiss olunan bel ağrısı və hərəkət məhdudluğu (tutulma) xalq arasında “onurğa revmatizmi” kimi tanınan ankilozan spondilit xəstəliyinin ən mühüm erkən əlamətlərindəndir.
Professor qeyd edib ki, ankilozan spondilit onurğa sütununu və çanaq oynaqlarını zədələyən xroniki iltihabi revmatik xəstəlikdir. Xəstəlik adətən 20–40 yaş arasında başlayır və kişilərdə daha çox müşahidə olunur.
Mütəxəssis bildirib ki, səhərlər 30 dəqiqədən çox davam edən bədən tutulması, istirahət zamanı güclənən, hərəkət etdikcə isə azalan bel ağrısı, gecələr yuxudan oyadan ağrılar və zamanla yaranan hərəkət məhdudluğu xəstəliyin əsas xəbərdaredici əlamətləridir. Bu şikayətlər uzun müddət davam edərsə, mütləq revmatoloq və ya fiziki təbabət və reabilitasiya mütəxəssisinə müraciət edilməlidir.
Prof. Koca vurğulayıb ki, bel ağrısı çox vaxt əzələ gərginliyi və ya bel yırtığı ilə qarışdırılır. Bu isə diaqnozun gecikməsinə, nəticədə onurğada qalıcı hərəkət məhdudluğu, duruş pozğunluğu və gündəlik fəaliyyət qabiliyyətinin azalmasına səbəb olur. Erkən başlanılan müalicə isə ağrının nəzarət altına alınmasına, onurğanın hərəkətliliyinin qorunmasına və xəstəliyin irəliləməsinin ləngidilməsinə kömək edir.
Mütəxəssis bildirib ki, müalicə yalnız dərman qəbulundan ibarət deyil. Müntəzəm fiziki məşqlər, fizioterapiya və reabilitasiya ilə yanaşı, xəstəyə uyğun kompleks müalicə planı hazırlanmalıdır. Manual terapiya, akupunktur, neyralterapiya və ozon terapiyası kimi tamamlayıcı üsullar da fərdi müalicə proqramına daxil edilir.
Professorun sözlərinə görə, düzgün qidalanma da müalicənin mühüm hissəsidir. Rafinə edilmiş şəkərdən və yüksək dərəcədə emal olunmuş qidalardan uzaq durmaq, təbii və balanslı qidalanmaq, tərəvəz, keyfiyyətli zülal və sağlam yağlarla zəngin qida rasionuna üstünlük vermək iltihabın nəzarətdə saxlanmasına və ümumi sağlamlığın qorunmasına kömək edir. Bağırsaq sağlamlığını dəstəkləyən qidalanma vərdişləri, ideal çəkinin qorunması, siqaretin tərgidilməsi, keyfiyyətli yuxu və stressin idarə olunması da kompleks müalicənin vacib hissələrindəndir.
Sonda Prof. Koca qeyd edib ki, xüsusilə gənc kişilərdə üç aydan uzun davam edən, istirahətlə güclənən, hərəkətlə azalan səhər bel ağrısı və tutulma ankilozan spondilitin mühüm xəbərdaredici əlaməti ola bilər. Erkən diaqnoz və fərdi müalicə sayəsində xəstələr həm onurğa hərəkətliliyini qoruya, həm də aktiv və keyfiyyətli həyat tərzi sürə bilərlər.
Mənbə:CNN Türk
Hazırladı:Ziyalə Əhmədli
Gundelik.az
