Qlobal maliyyə bazarlarında ABŞ-dən gələn mülayim inflyasiya göstəriciləri fonunda müsbət əhval-ruhiyyə müşahidə olunur.
Gundelik.az xəbər verir ki, analitiklərin fikrincə, bu nəticələr sentyabr ayında ABŞ Federal Ehtiyat Sisteminin (FED) faiz dərəcələrini azaltmaq ehtimalını artırıb.
İyul ayında ABŞ İstehlakçı Qiymətləri İndeksi (CPI) aylıq 0,2 faiz artaraq gözləntilərə uyğun nəticə göstərib. İllik artım isə 2,7 faiz olub ki, bu da proqnozlardan aşağıdır. Enerji və qida qiymətləri istisna edilən əsas CPI aylıq 0,3 faiz, illik isə 3,1 faiz yüksəlib və son beş ayın maksimum səviyyəsinə çatıb.
Pul bazarlarında FED-in sentyabrda faiz endiriminə gedəcəyi demək olar ki, qəti hesab edilir. ABŞ Maliyyə Naziri Skott Bessent hətta 50 baza bəndlik azalma təklif edib. Gözləntilərin güclənməsi Nyu-York birjasında indekslərin rekord səviyyədə bağlanmasına səbəb olub.
Qiymətli metallar və valyuta bazarı
Faiz endirimi ehtimalları və dollara tələbin azalması qızılın qiymətini dəstəkləyib. Dünən qızılın unsiyası 0,2 faiz artaraq 3 348 dollardan bağlanıb, bu gün isə 0,1 faiz artımla 3 351 dollara satılır. ABŞ-ın 10 illik istiqraz faizi 4,24 faizədək geriləsə də, günü 4,29 faizlə başa vurub. Dollar indeksi 98,1-dən 98 səviyyəsinə enib.
Səhmlər və korporativ xəbərlər
S&P 500 indeksi 1,14 faiz, Nasdaq 1,39 faiz, Dow Jones isə 1,10 faiz yüksələrək bağlanışda rekord qırıb. Intel şirkətinin səhmləri 5,5 faiz, Alphabet (Google) isə Perplexity AI startapının Chrome brauzerini alma ehtimalı xəbərlərindən sonra 1,3 faiz bahalaşıb.
Avropa bazarları
Avropada indekslər əsasən müsbət zonada ticarət edilib. Almaniya istisna olmaqla, region bazarları ABŞ-dakı inflyasiya məlumatlarının təsiri ilə yüksəlib. FTSE 100 indeksi 0,2 faiz, Fransanın CAC 40-ı 0,7 faiz, İtaliyanın FTSE MIB-i 0,85 faiz, Almaniyanın DAX 40-ı isə 0,23 faiz artıb.
Asiya bazarları
Asiya fond bazarlarında da müsbət tendensiya davam edir. Çin və ABŞ arasında tariflərin 90 gün təxirə salınması və FED-dən faiz endirimi gözləntiləri investor əhvalını gücləndirib. Nikkei 225 indeksi 1,5 faiz, Şanxay kompozit indeksi 0,6 faiz, Honq Konq Hang Seng 1,9 faiz, Cənubi Koreya Kospi isə 0,8 faiz dəyər qazanıb.
Türkiyə bazarı
BIST 100 indeksi isə dünən 0,76 faiz geriləyərək 10 954,50 bəndlə bağlanıb. USD/TRY məzənnəsi bu gün 40,7520 səviyyəsində ticarət olunur. Analitiklər BIST 100-də 10 900 və 10 800 bənd səviyyələrini dəstək, 11 000 və 11 100 bəndlərini isə müqavimət olaraq qiymətləndirir.
Əlavə olaraq, analitiklər ABŞ Prezidenti Donald Tramp və Rusiya Prezidenti Vladimir Putin arasında keçiriləcək görüşün nəticələrinin, həm qızıl, həm də bazarların ümumi istiqamətinə təsir göstərə biləcəyini vurğulayırlar.
Gundelik.az
