Qadınlarda infarkt hər zaman klassik sinə ağrısı ilə özünü göstərmir. Nəfəs darlığı, səbəbsiz yorğunluq, ürəkbulanma, başgicəllənmə, bel və ya çənə ağrısı da ürək probleminin əlaməti ola bilər. Xüsusilə menopauzadan sonra yeni yaranan şikayətlər diqqətdən kənarda qalmamalıdır.
Qadınlarda ürək-damar xəstəliklərinin riski yaş artdıqca yüksəlir. Menopauza ilə estrogen hormonunun qoruyucu təsirinin azalması bu riski daha da artırır. Qadınlarda infarkt kişilərlə müqayisədə daha fərqli və qeyri-tipik əlamətlərlə ortaya çıxır.
Diqqət edilməli 5 əsas əlamət:
Nəfəs darlığı
Səbəbsiz və davamlı yorğunluq
Ürəkbulanma və ya mədə narahatlığı
Başgicəllənmə, halsızlıq və ya huşunu itirəcək kimi olma
Bel, kürək və ya çənə nahiyəsində ağrı
Bundan əlavə, fiziki fəaliyyət zamanı təkrarlanan sinə təzyiqi və ağrısı, səbəbsiz ürəkdöyünmə, fiziki gücün əvvəlkindən nəzərəçarpacaq dərəcədə azalması da kardioloji müayinə üçün səbəbdir.
Menopauzadan sonra risk artır
Estrogenin səviyyəsinin azalması ilə xüsusilə menopauzadan sonra koronar arteriya xəstəliyinin riski artır. Yüksək təzyiq, yüksək xolesterin, diabet, piylənmə, siqaret istifadəsi və ailədə erkən yaşda ürək xəstəliyinin olması da riski yüksəldir.
Hamiləlik tarixçəsi də ürək-damar riskinin qiymətləndirilməsində nəzərə alınmalıdır. Xüsusilə yeni başlayan ürək-damar şikayətləri menopauzadan sonra yaranıbsa, onların başqa səbəblərlə əlaqəli olduğu düşünülərək laqeyd yanaşmaq düzgün deyil.
Güclü stress də ürəyə təsir edir
Qadınlarda spontan koronar arteriya disseksiyası (SCAD) kimi nadir, lakin ciddi vəziyyətlər də infarkta səbəb olur. Bu zaman ürəyi qidalandıran damar divarında yırtılma baş verir. Hamiləlik, doğuşdan sonrakı dövr, ağır fiziki fəaliyyət və güclü emosional stress bu vəziyyətlə əlaqəlidir.
Digər tərəfdən, “sınıq ürək sindromu” kimi tanınan Takotsubo sindromu da xüsusilə menopauzadan sonrakı qadınlarda daha çox görülür. Güclü kədər, qorxu, emosional sarsıntı, əməliyyat, ciddi infeksiya və ya travmadan sonra yaranır. Sinə ağrısı, nəfəs darlığı, ürəkdöyünmə, tərləmə və ürəkbulanma kimi əlamətlər yarada bildiyindən infarkta bənzəyir.
Bu vəziyyət əksər hallarda ürək funksiyasının bir neçə həftə ərzində yaxşılaşması ilə nəticələnsə də, kəskin dövrdə ürək çatışmazlığı və ritm pozğunluğu kimi ciddi fəsadlara səbəb olur.
Sinə ağrısı, nəfəs darlığı, soyuq tər, güclü halsızlıq, ürəkbulanma və ya ağrının çənə, kürək və qola yayılması kimi infarkt əlamətləri yaranarsa, xüsusilə də qəfil başlayıbsa, təcili tibbi yardım çağırmaq lazımdır.
Qadınlarda ürək xəstəliklərinin əlamətləri həmişə tipik olmadığı üçün qeyri-adi şikayətləri də ciddiyə almaq vacibdir. Yaş, menopauza, hamiləlik tarixçəsi, xroniki xəstəliklər və digər risk faktorlarının mütəmadi qiymətləndirilməsi ürək-damar xəstəliklərinin erkən aşkarlanmasına kömək edir.
Mənbə:CNN Türk
Hazırladı:Ziyalə Əhmədli
Gundelik.az
