Azərbaycan Pediatriya Cəmiyyətinin təşkilatçılığı ilə III “Müasir Pediatriyanın İşığında” elmi-praktik konfransı 20 iyun tarixində Naxçıvan Muxtar Respublika Xəstəxanasında keçiriləcək. Ənənəvi olaraq təşkil edilən tədbir pediatriya sahəsində çalışan mütəxəssisləri bir araya gətirərək elmi yeniliklərin müzakirəsi, müasir tibbi yanaşmaların təqdimatı və peşəkar təcrübə mübadiləsi üçün geniş imkan yaradacaq.
Konfrans çərçivəsində iştirakçılar pediatriyanın müxtəlif istiqamətlərini əhatə edən aktual mövzular üzrə məruzələri dinləyəcək, uşaq sağlamlığının qorunması, xəstəliklərin erkən diaqnostikası, müasir müalicə üsulları və profilaktik tədbirlər sahəsində son yeniliklərlə tanış olacaqlar. Tədbir eyni zamanda ölkənin müxtəlif bölgələrindən olan pediatrlar, rezidentlər və ailə həkimləri arasında əməkdaşlıq əlaqələrinin gücləndirilməsinə xidmət edəcək.
Layihə çərçivəsində sosial yönümlü tədbirlər də nəzərdə tutulub. Belə ki, cari ayın 21-də Naxçıvan ərazisində uşaq və körpələr üçün ödənişsiz tibbi müayinələr təşkil olunacaq. Müayinələrin keçirilməsində əsas məqsəd uşaqların sağlamlıq vəziyyətinin qiymətləndirilməsi, valideynlərin maarifləndirilməsi və erkən diaqnostikanın təşviq edilməsidir.
Qeyd edək ki, layihə qeyri-hökumət təşkilatı tərəfindən həyata keçirilir və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən maliyyələşdirilir.
Azərbaycan Pediatriya Cəmiyyəti bütün pediatrları, rezidentləri, ailə həkimlərini və səhiyyə sahəsində çalışan mütəxəssisləri III “Müasir Pediatriyanın İşığında” konfransında iştirak etməyə dəvət edir.
Tarix: 20 iyun
Məkan: Naxçıvan Muxtar Respublika Xəstəxanası
Təşkilatçı: Azərbaycan Pediatriya Cəmiyyəti
Konfrans və layihə çərçivəsində keçiriləcək tibbi müayinələr həm peşəkar biliklərin artırılmasına, həm də uşaqların sağlamlığının qorunmasına töhfə verən mühüm təşəbbüslərdən biri kimi qiymətləndirilir.
Gundelik.az