Müasir mənzillərdə sahədən səmərəli istifadə etmək interyer dizaynının əsas məsələlərindən birinə çevrilib. Xüsusilə kiçik evlərdə mebel seçimi həm rahatlığa, həm də məkanın vizual görünüşünə birbaşa təsir göstərir. Düzgün seçilmiş mebel otağı daha geniş, işıqlı və funksional göstərə bilər. Bunun üçün ölçülərə, rəng seçiminə, mebelin formasına və istifadə imkanlarına xüsusi diqqət yetirmək lazımdır.
Mövzu ilə bağlı “Alısoy Mebel” şirkətinin rəhbəri Fuad Alısoy Gundelik.az-a açıqlamasında bildirib ki, kiçik evlər üçün mebel seçərkən əsas məqsəd mövcud sahədən maksimum səmərə ilə istifadə etmək olmalıdır.
Onun sözlərinə görə, mebel almamışdan əvvəl otağın ölçüləri dəqiq müəyyənləşdirilməli, qapıların açılma istiqaməti, pəncərələrin yerləşməsi və insanların rahat hərəkəti üçün lazım olan boş sahə nəzərə alınmalıdır:
“Bəzən böyük və cəlbedici görünən mebel kiçik otaqda həm hərəkəti məhdudlaşdırır, həm də məkanı olduğundan daha dar göstərir.
Kiçik mənzillərdə çoxfunksiyalı mebellərə üstünlük vermək daha məqsədəuyğundur. Əşyaların saxlanması üçün daxili bölmələri olan çarpayılar, açılan divanlar, qatlanan masalar və ehtiyaca uyğun hazırlanan dolablar həm yerə qənaət edir, həm də evdə səliqə yaradır. Mebelin rəngi və dizaynı da məkanın geniş görünməsində mühüm rol oynayır. Açıq rənglər, sadə xətlər və vizual olaraq ağır görünməyən modellər kiçik otaqlarda daha uğurlu nəticə verir. Həddindən artıq iri, tünd rəngli və çoxsaylı dekorativ detalları olan mebellər isə məkanı daha dolu göstərə bilər”.
O bildirib ki, divar hündürlüyündən düzgün istifadə etmək də vacibdir.
“Tavana qədər uzanan dolablar şaquli sahədən səmərəli yararlanmağa imkan verir. Eyni zamanda, sifarişlə hazırlanan mebellər otağın ölçülərinə uyğunlaşdırıldığı üçün istifadəsiz qalan künclərin və boşluqların funksional sahəyə çevrilməsinə kömək edir. Kiçik evlərdə mebel seçərkən yalnız xarici görünüşə deyil, materialın keyfiyyətinə, mexanizmlərin davamlılığına və gündəlik istifadədə rahatlığa da diqqət yetirilməlidir. Çünki yerə qənaət edən mebel eyni zamanda uzunömürlü və praktik olmalıdır”, – deyə o qeyd edib.
Nəticə etibarilə, kiçik evlər üçün düzgün mebel seçimi böyük büdcə və ya mürəkkəb dizayn həlləri tələb etmir. Əsas məsələ ölçüləri düzgün müəyyənləşdirmək, funksionallığı ön planda saxlamaq və hər bir əşyanın məkandakı yerini əvvəlcədən planlaşdırmaqdır. Düzgün yanaşma ilə kiçik mənzildə belə rahat, geniş və estetik mühit yaratmaq mümkündür.
Nuri
Gundelik.az
