Livanın səhiyyə nazirliyi bazar ertəsi günü İsrailin cənubi Livana hücumlarında ən azı 14 nəfərin öldüyünü açıqladı. İranın İsrailin Livanı bombalamağa davam edəcəyi təqdirdə qisas alacağı barədə xəbərdarlıqlarına baxmayaraq, hücumlar davam etdi. İsrail və İran Tehranın Livandakı İsrail hərbi əməliyyatlarına qarşı başlatdığı qarşılıqlı hücumlara son qoyduqlarını elan etsələr də, Tir və Mərvaniyyə ərazilərində yeni hava hücumları barədə məlumat verilib.
Livan Səhiyyə Nazirliyi bildirib ki, “İsrailin Tir şəhərindəki Qırmızı Xaç mərkəzinin yaxınlığındakı ərazini hədəf alan hava hücumu nəticəsində beş nəfər ölüb, səkkiz nəfər yaralanıb. Yaralananlardan dördü Qırmızı Xaç tibb işçisidir”.
Livan Mədəniyyət Nazirliyinin rəsmisi bildirib ki, İsrailin əvvəlki gün həyata keçirdiyi bombardman nəticəsində Tir şəhərindəki UNESCO-nun Dünya İrsi Siyahısına daxil olan ərazilərdən birinə də ziyan dəyib. Səhiyyə Nazirliyinin məlumatına görə, Mərvaniyyəyə edilən daha sonrakı hücumda biri uşaq olmaqla iki nəfər ölüb, 10 nəfər yaralanıb. Nəbatiyyə əyalətinin Ziftə şəhərinə günəş doğarkən edilən ayrı bir hava hücumunda biri suriyalı uşaq və biri qadın olmaqla yeddi nəfər həyatını itirib.
İranın dəstəklədiyi Hizbullah Livan daxilində İsrail əsgərlərini hədəf aldığını açıqladı, lakin İsrail ərazisinə edilən heç bir hücuma görə məsuliyyəti öz üzərinə götürmədi. İran İsrailin Livana qarşı hücumlarını davam etdirəcəyi təqdirdə hücumlara davam edəcəyi barədə xəbərdarlıq edib, İsrail rəsmiləri isə bazar ertəsi əməliyyatları dayandırmayacaqlarını vurğulayıblar.
İran Silahlı Qüvvələrinin Mərkəzi Komandanlığı İsrailə qarşı hücumların başa çatdığını elan edərək mətbuat açıqlamasında bildirib: “Əgər təcavüz və düşmənçilik hərəkətləri, xüsusən də Cənubi Livanda davam edərsə, əvvəlkindən daha sərt və dağıdıcı cavablar olacaq”.
Buna cavab olaraq İsrail müdafiə naziri İsrael Katz ordunun “Livanda Hizbullah terror təşkilatına qarşı əməliyyatlarını davam etdirəcəyini” bildirib.
Katz həmçinin bildirib ki, İsrailin şimalına edilən hər hansı bir hücum Beyrutun cənub ətraflarına qarşı qisasla qarşılanacaq.
Mənbə:Euronews
Tərtib etdi:Səid Mikayılzadə
Gundelik.az
