İstifadəçilərin rəyini dinlədikdən sonra Google Gemini for Home üçün yeni yeniləmələri mərhələli şəkildə təqdim etməyə başlayıb. Bu dəfə əsas məqsəd sadədir: istifadəçiləri bezdirən problemləri aradan qaldırmaq.
Gemini for Home-un Baş Məhsul Direktoru Anish Kattukaran yaxın zamanda paylaşdığı açıqlamada bildirib ki, komanda “istifadəçi rəylərinə əsaslanan təkmilləşdirmələr üzərində intensiv işləyib”. Bir sıra düzəliş və yeniləmələr artıq Gemini for Home, Google Home tətbiqi, avtomatlaşdırmalar və dəstəklənən cihazlar üzrə istifadəyə verilib.
Otaq əmrləri artıq daha ağıllıdır
Əgər nə vaxtsa “mətbəxi söndür” deyib və ağıllı köməkçinin işıqlardan əlavə başqa cihazları da söndürdüyünü görmüsünüzsə, tək deyilsiniz. Rəhbərin sözlərinə görə, Gemini artıq otaq əsaslı səsli əmrləri daha dəqiq hədəfləyə bilir.
Artıq “mətbəxi söndür” dedikdə Gemini yalnız işıqları söndürəcək, həmin otağa aid olan digər ağıllı prizləri və ya qoşulu cihazları yox. Bu kağız üzərində kiçik dəyişiklik kimi görünsə də, soyuducu, router və daim işlək olan digər cihazlara ağıllı priz qoşanlar üçün bu, böyük rahatlıq deməkdir.
Artıq təsadüfi cihaz qruplaşdırması yoxdur
Digər mühüm yenilik isə Gemini-nin otağa təyin edilməmiş və ya dəqiq kateqoriyaya salınmamış cihazlarla davranışıdır. Əvvəllər belə cihazlar ümumi əmrlərə daxil edilə bilər və gözlənilməz nəticələrə səbəb olardı.
Yeni dəyişikliklərin mahiyyəti ondan ibarətdir ki, Gemini artıq istifadəçinin niyyətini daha yaxşı anlayır. Otaq səviyyəsində dəqiq hədəfləmə əsas yenilik olsa da, Kattukaran Gemini for Home, Google Home tətbiqi, ağıllı ev avtomatlaşdırmaları və digər dəstəklənən cihazlarda daha geniş yeniləmələrin də yayımlandığını vurğulayıb.
Mənbə: Digital Trends
Hazırladı:Ziyalə Əhmədli
Gundelik.az
