Fransanın cənubunda, İspaniya sərhədi yaxınlığında yerləşən Aude bölgəsində baş verən güclü meşə yanğını 39,5 min hektardan çox ərazini məhv edib.
Gundelik.az xarici mediaya istinadən xəbər verir ki, bu, Paris şəhərinin ərazisindən daha böyük sahənin yanması deməkdir.
Hadisə nəticəsində azı bir nəfər ölüb, 13 nəfər yaralanıb, üç nəfər isə itkin düşüb.
Fransa Baş naziri Fransua Bayrou bu yanğını “görünməmiş miqyaslı fəlakət” adlandırıb. Alovlarla mübarizə üçün 2100-dən çox yanğınsöndürən və bir neçə yanğınsöndürən təyyarə cəlb edilib. Cümə axşamından etibarən hərbi qüvvələr də əraziyə yerləşdiriləcək.
Yanğın çərşənbə axşamı Ribaute kəndində başlayıb və isti, quru, küləkli hava səbəbindən sürətlə yayılıb. Yerli sakinlərdən Endi Pikap vəziyyəti belə təsvir edib: “Göy əvvəlcə mavi idi, lakin bir saatdan az müddətdə narıncıya çevrildi. Hər tərəf alova büründü”.
Jonquieres kəndinin meri bildirib ki, kəndin üçdə ikisi yanıb və ərazi ay səthinə bənzəyir. Bölgədə əsas gəlir mənbəyi olan şərabçılıq və turizm sektoru ciddi zərər görüb. İki düşərgə təxliyə olunub, sakinlərə və turistlərə evdə qalmaq tövsiyə edilib.
Fransa Ekologiya Nazirliyi Aude bölgəsində güclü quraqlıq yaşandığını və su istifadəsinə məhdudiyyət qoyulduğunu bildirib. Son aylarda az yağıntı səbəbindən bitki örtüyü tamamilə quruyub, bu da yanğının yayılmasını asanlaşdırıb.
Milli fövqəladə hallar xidmətinə görə, bu, 2006-cı ildən bəri Fransada qeydə alınmış ən böyük meşə yanğınıdır.
Mütəxəssislər bu yanğının təkcə Fransada deyil, Cənubi Avropada iqlim dəyişikliyi fonunda artan meşə yanğınlarının bir hissəsi olduğunu deyirlər. Avropa İttifaqının Kopernik İqlim Xidməti bildirir ki, Avropa qlobal ortalamadan iki dəfə daha sürətlə istiləşir.
Son olaraq, 10 ildir bölgədə yaşayan Endi Pikap vəziyyəti belə yekunlaşdırıb: “Əvvəllər belə bir şey yaşamamışdıq. Yaylar getdikcə daha isti olur, yağış isə demək olar ki, yox dərəcəsindədir. Bu, ciddi problemdir”.
Gundelik.az
