Cehiz hazırlığı zamanı ən çox vaxt və diqqət tələb edən məsələlərdən biri də qab-qacaq seçimidir. Müxtəlif materiallardan hazırlanan, fərqli qiymət və dizaynda təqdim olunan məhsullar arasında seçim etmək isə bəzən heç də asan olmur. Xüsusilə cehiz üçün bir neçə dəst qab-qacaq alındıqda, yalnız görünüşə və qiymətə əsaslanmaq sonradan arzuolunmaz nəticələrə səbəb ola bilər.
Bazarda çini, keramika, şüşə, paslanmayan polad və digər materiallardan hazırlanan çoxsaylı məhsullar var. Bəs onların keyfiyyətini necə müəyyən etmək olar? Cehiz üçün qab-qacaq seçərkən hansı detallara diqqət yetirmək lazımdır və daha bahalı məhsul həqiqətən daha keyfiyyətlidirmi?
Mövzu ilə bağlı Gundelik.az-a danışan qab-qacaq üzrə mütəxəssis Niyazi Vəliyev bildirib ki, cehiz üçün qab-qacaq seçərkən ilk növbədə məhsulun materialına və istifadə məqsədinə diqqət yetirmək lazımdır.
Onun sözlərinə görə, qabın yalnız görünüşü və qiyməti onun keyfiyyət göstəricisi hesab edilə bilməz.
“Cehiz üçün qab-qacaq alarkən insanlar çox vaxt dəstin sayına və xarici görünüşünə diqqət yetirirlər. Halbuki məhsulun hansı materialdan hazırlandığı, istehsal keyfiyyəti, səthinin vəziyyəti və gündəlik istifadəyə nə dərəcədə uyğun olması daha vacibdir. Məsələn, qabın üzərində çat, qabarcıq, rəng fərqi və ya digər istehsal qüsurlarının olub-olmamasını yoxlamaq lazımdır. Şüşə və çini məmulatlarda məhsulun kənarlarının hamar olması, üzərində çatların olmaması xüsusilə önəmlidir. Həmçinin qabların qida ilə təmas üçün nəzərdə tutulduğuna əmin olmaq lazımdır”, – deyə o bildirib.
Mütəxəssis qeyd edir ki, cehiz üçün qab-qacaq alarkən bütün məhsulları yalnız bir dəst şəklində almaq da vacib deyil. Gündəlik istifadə ediləcək qablarla qonaq üçün nəzərdə tutulan məhsulların ehtiyac və keyfiyyət baxımından fərqləndirilməsi daha məqsədəuyğun ola bilər. Bundan başqa, qab-qacağın qabyuyan maşında və ya mikrodalğalı sobada istifadəyə yararlı olub-olmaması da əvvəlcədən öyrənilməlidir.
Niyazi Vəliyevin fikrincə, qab-qacağın qiyməti ilə keyfiyyəti arasında müəyyən əlaqə olsa da, “bahalıdırsa, deməli, keyfiyyətlidir” yanaşması həmişə doğru deyil. Alıcı məhsulun tərkibi, istehsalçısı, istifadə qaydaları və zəmanət şərtləri barədə məlumat almalıdır. Xüsusilə cehiz alış-verişində çoxlu sayda məhsul alındığı üçün əvvəlcədən siyahı hazırlamaq və həqiqətən istifadə ediləcək əşyaları müəyyənləşdirmək həm keyfiyyətli seçim etməyə, həm də lazımsız xərclərin qarşısını almağa kömək edə bilər.
Cehiz üçün qab-qacaq seçərkən əsas məqsəd çox sayda məhsul toplamaq deyil, uzun müddət istifadə edilə biləcək, sağlamlıq və təhlükəsizlik baxımından uyğun, funksional və keyfiyyətli əşyalar almaqdır. Bu baxımdan alıcı üçün ən doğru yanaşma yalnız məhsulun görünüşünə deyil, onun materialına, istehsal keyfiyyətinə və istifadə xüsusiyyətlərinə diqqət yetirməkdir.
Nurəddin Abdullayev
Gundelik.az
