Amerikanın aviasiya, kosmik və müdafiə sənayesi nəhəngi “Boeing Co.” üçüncü rübdə 777X təyyarə proqramında baş verən növbəti gecikmə ilə əlaqədar 4,9 milyard dollar məbləğində silinmə qeydə alıb.
Gundelik.az-ın şirkətə istinadən məlumatına görə, xalis zərər ötən ilin eyni dövrü ilə müqayisədə azalıb. Bu, əsasən kommersiya təyyarələrinin istehsalının artması ilə izah olunur. İyul–sentyabr aylarında Boeing-in xalis zərəri 5,34 milyard dollar (hər səhm üçün 7,14 dollar) təşkil edib. Keçən ilin analoji dövründə bu göstərici 6,17 milyard dollar (hər səhm üçün 9,97 dollar) idi.
Düzəliş edilmiş zərər hər səhm üçün 7,47 dollar səviyyəsində olub, halbuki LSEG tərəfindən sorğu edilən analitiklər bu göstəricinin 4,59 dollar olacağını proqnozlaşdırmışdılar.
Bununla belə, Boeing-in rüblük gəliri ötən ilin müvafiq dövründəki 17,8 milyard dollardan 23,3 milyard dollara yüksələrək analitiklərin 21,97 milyard dollarlıq proqnozunu üstələyib.
Şirkət bildirib ki, yeni nəsil 777X modelinin tədarükü 2027-ci ilə qədər başlamayacaq. Bu, ilkin gözləntilərdən yeddi il gecikmə deməkdir. Gecikmənin səbəbi kimi tənzimləyici proseslərdəki ləngimələr göstərilir. Ümumilikdə Boeing bu proqram üzrə təxminən 15 milyard dollar dəyərində silinmə həyata keçirib.
Hesabat dövründə kommersiya təyyarələri bölməsinin gəliri 49% artaraq 11,09 milyard dollara, tədarüklər isə 38% artaraq 160 ədədə çatıb – bu da 2018-ci ildən bəri ən yüksək göstəricidir. 737 seriyalı təyyarələrin istehsalı ayda 38 ədəd səviyyəsində sabitləşib. Şirkət, həmçinin, ABŞ Federal Aviasiya Administrasiyasından (FAA) istehsal həcmini artırmaq üçün razılıq alıb.
Sentyabrın sonuna Boeing-in mülki aviasiya sifariş portfeli 535 milyard dollar dəyərində qiymətləndirilib və 5900-dən çox təyyarə sifarişi daxil olub.
Müdafiə və kosmik bölmənin satışları rübdə 25% artaraq 6,9 milyard dollara çatıb. Şirkət, həmçinin, 2023-cü ilin sonundan bəri ilk dəfə 238 milyon dollar həcmində müsbət sərbəst pul axını əldə edib.
Bununla belə, çərşənbə günü bazar öncəsi ticarətdə Boeing səhmləri 1% ucuzlaşıb, lakin ilin əvvəlindən bu günə qədər onların dəyəri 26% artıb.
Gundelik.az
