ABŞ və İsrailin İrana zərbələr endirməsindən sonra Yaxın Şərqdə münaqişə beşinci gününə daxil olub. Bu hücumlar zamanı ölkənin ali rəhbəri öldürülüb.
İran cavab olaraq İsrailə və Körfəz bölgəsində ABŞ-ın müttəfiqi olan dövlətlərə hücumlar həyata keçirməyə davam edib. Bu hücumlar hərbi obyektlərlə yanaşı, mülki hədəflərə və enerji infrastrukturuna da yönəlib.
Döyüşlər sürətlə genişlənərək son günlər Kipr və Livanı da cəlb edib, hər iki tərəfdə itkilər və dağıntılar artmaqdadır.
İranda nə baş verir?
ABŞ və İsrail 28 fevral tarixində İrana qarşı genişmiqyaslı zərbələr endirib. Hədəflər arasında Tehranda və ölkənin digər bölgələrində raket infrastrukturu, hərbi obyektlər və yüksək səviyyəli rəhbərlik yer alıb.
1989-cu ildən ölkəyə rəhbərlik edən İranın ali rəhbəri Ayətullah Əli Xamenei ilk hücum dalğası zamanı öldürülüb. İsrail ordusu həmçinin İranın güclü İslam İnqilabı Keşikçiləri Korpusunun (SEPAH/IRGC) onlarla yüksək rütbəli üzvünün də öldürüldüyünü bildirib.
Həftəsonundan etibarən ABŞ və İsrail əsas obyektləri hədəf almağa davam edib. İsrail gizli nüvə obyektinin də vurulduğunu bildirib. İran isə nüvə proqramının tamamilə dinc məqsədlər daşıdığını dəfələrlə bəyan edib.
ABŞ-İsrail hücumları başlayandan bəri İranda ölənlərin sayı İran Qızıl Aypara Cəmiyyətinin məlumatına görə 787 nəfərə çatıb. ABŞ-da yerləşən “Human Rights Activists in Iran” (HRANA) təşkilatı isə 1.097 mülki şəxsin, o cümlədən 181 uşağın həlak olduğunu bildirib.
İran şənbə günü ölkənin cənubunda SEPAH bazası yaxınlığında yerləşən qızlar məktəbinə hücum edildiyini iddia edib və 160-dan çox insanın öldüyünü açıqlayıb.
ABŞ hadisə ilə bağlı məlumatları araşdırdığını bildirib, İsrail isə həmin ərazidə hərbi əməliyyat barədə məlumatlı olmadığını deyib.
İranda internet əlaqəsi demək olar ki, tamamilə məhdudlaşdırılıb və ölkənin hava məkanı bağlanıb.
Mənbə: BBC
Hazırladı: Ziyalə Əhmədli
Gundelik.az
