Tayvan, ABŞ-ın İran ilə yaşanan müharibə səbəbindən uzun mənzilli qanadlı raket ehtiyatlarını tükətdiyini və bunun Çinin mümkün işğalına qarşı müdafiəni zəiflədə biləcəyi ilə bağlı narahatlığını ifadə edib.
Ümumi vəziyyət
ABŞ-ın Orta Şərqdəki münaqişələr zamanı yüzlərlə JASSM tipli dəqiq zərbə raketləri və gəmidən buraxılan Tomahawk raketlərindən istifadə etdiyi təxmin edilir.
Müdafiə ekspertləri bildirir ki, bu silahlar düşmənin hava hücumundan müdafiə sistemlərinin əhatəsindən kənardan atıla bildiyi üçün Tayvanın müdafiəsində kritik rol oynayır.
Strateji ehtiyatlar azalır
Yüksək vəzifəli bir Tayvanlı müdafiə rəsmisi bildirib ki, ABŞ qüvvələri Tayvana qarşı mümkün hücumu dəf etmək üçün lazım olan sursatları başqa bölgələrdə istifadə edir və bu, çəkindirmə qabiliyyətini zəiflədir.
Tayvanın milli təhlükəsizlik rəsmiləri isə ABŞ-ın resurslarını digər cəbhələrə həddindən artıq yönəltməsinin balanssızlıq yaratdığını vurğulayıblar.
Strateji və Beynəlxalq Araşdırmalar Mərkəzinin (CSIS) hesabatına görə, ABŞ ordusu İranla bağlı müharibənin ilk altı günündə 786 ədəd JASSM və 319 ədəd Tomahawk raketi istifadə edib. Bu rəqəmlər həmin raketlərin bir neçə illik istehsalına bərabərdir.
Çinlə mümkün münaqişədə əhəmiyyəti
Mütəxəssislər bildirir ki, JASSM və Tomahawk kimi silahlar Çin hava müdafiə sistemlərindən yayınaraq sahil bazalarını və mümkün işğal donanmasını hədəfə almaq üçün əsas vasitələrdir.
2023-cü ildə aparılan hərbi simulyasiyalarda ABŞ-ın Çin gəmilərini batırmaq və hava bazalarını məhv etmək üçün JASSM ehtiyatını bir neçə həftə ərzində tükətdiyi göstərilib.
ABŞ Müdafiə Nazirliyi (Pentaqon) sursat ehtiyatları və yerləşdirilmə yerləri barədə açıq məlumat verməsə də, büdcə sənədləri 2023-cü ilə qədər təxminən 5,500 ədəd JASSM alındığını göstərir.
Lakin istehsalçı şirkət Lockheed Martin-in çatdırılmalarının sifarişlərdən təxminən üç il geri qaldığı bildirilir.
Hazırlıq səviyyəsi risk altındadır
Samuel Paparo daha əvvəl açıqlamalarında bildirib ki, sursatların başqa bölgələrdə istifadə olunması Hind-Sakit okean regionunda hazırlıq səviyyəsinə mənfi təsir göstərir.
O qeyd edib ki, Çin dünyanın ən güclü potensial rəqiblərindən biri olduğu üçün bu region sursat miqdarı və keyfiyyəti baxımından ən çətin bölgələrdən biridir.
Analitiklər isə vurğulayır ki, mövcud münaqişələrdə riski azaltmaq üçün uzun mənzilli və müasir silahlara üstünlük verilməsi gələcək böyük müharibələr üçün mövcud imkanları azaldır.
Mənbə: TRT Haber
Hazırladı: Ziyalə Əhmədli
Gundelik.az
