Beyin iltihabı (ensefalit) bəzi insanlarda qəfil və ağır simptomlarla özünü göstərsə də, bəzi hallarda həftələr, hətta aylar ərzində hiss olunmadan irəliləyir. Mütəxəssislər unutqanlıq, şəxsiyyət dəyişiklikləri, nitq problemləri, şüurun qarışması və qıcolma kimi əlamətlərin ciddi qəbul edilməli olduğunu bildirirlər. Gecikmiş müalicənin isə qalıcı nevroloji problemlərə səbəb ola biləcəyi barədə xəbərdarlıq edirlər.
Nevroloq, dosent Dr. Eren Toplutaş beyin iltihabının erkən aşkarlanmasının müalicə prosesində böyük əhəmiyyət daşıdığını vurğulayıb.
Mütəxəssislərin sözlərinə görə, beyin iltihabının ən geniş yayılmış səbəblərindən biri infeksiyalardır. Xüsusilə virus və bakteriyaların səbəb olduğu ensefalit sürətlə ağırlaşır. Bu əlamətlər müşahidə edildikdə təcili tibbi müayinədən keçmək və müalicəyə mümkün qədər tez başlamaq vacibdir.
Beyin iltihabına yalnız infeksiyalar səbəb olmur
Mütəxəssislər vaxtında müdaxilənin həyati əhəmiyyət daşıdığını bildirirlər. Xəstəlik müalicə edilmədikdə ciddi fəsadlara səbəb olur.
Dr. Toplutaşın sözlərinə görə, beyin iltihabı yalnız mikrobların səbəb olduğu xəstəlik deyil. Son illərdə autoimmun və paraneoplastik ensefalitlər də daha çox tanınmağa başlayıb.
Autoimmun ensefalit zamanı immun sistemi səhvən beyin hüceyrələrinə hücum edir. Bəzi hallarda isə orqanizmdə yaranan xərçənglə əlaqəli anormal zülallar beyin toxumasına təsir göstərir.
Əlamətləri sadə unutqanlıqla qarışdırmayın
Autoimmun mənşəli beyin iltihabları adətən qəfil deyil, daha yavaş inkişaf edir. Unutqanlıq, şəxsiyyət və davranış dəyişiklikləri, nitq problemləri, şüur bulanıqlığı və qıcolmalar kimi əlamətlər müşahidə olunur.
Mütəxəssislər bu simptomların sadəcə stress və ya adi unutqanlıq kimi qiymətləndirilməməsi barədə xəbərdarlıq edirlər. Erkən diaqnoz və düzgün müalicə ilə beyin iltihabının səbəb ola biləcəyi ciddi fəsadların qarşısını almaq mümkündür.
Mənbə:CNN Türk
Hazırladı:Ziyalə Əhmədli
Gundelik.az
