Bəzən insanın həyatında elə bir məqam yetişir ki, uzun illər qəlbinin dərinliyində gizli qalan arzular yenidən boy göstərir. Elə insanlar da olur ki, onların bir sözü, bir təşəbbüsü taleyin istiqamətini dəyişir, insanı yenidən öz sevdasına qovuşdurur. Sevimku şairə və ədəbiyyatçı Sevil Ülvi üçün də ədəbiyyata dönüş məhz belə bir təsadüfdən başlayıb. Vaxtilə jurnalistika sahəsində çalışan, sonralar pedaqoji fəaliyyətlə məşğul olan Sevil Ülvi uzun fasilədən sonra Kitabçılar Birliyinin sıralarında yenidən söz dünyasına qayıdıb. Bu gün isə ömrünün əlli illik yoluna nəzər salarkən onun üçün ən dəyərli hədiyyələrdən biri – “Qadın istərsə” adlı ilk kitabı oxucularla görüşə gəlib. Maraqlıdır ki, kitab müəllifdən xəbərsiz şəkildə Kitabçılar Birliyinin rəhbəri Esmira xanımın və birlik üzvlərinin sürprizi olaraq nəşr edilib.
Bu münasibətlə Gundelik.az olaraq şairə və ədəbiyyatçı Sevil Ülvi ilə söhbətləşdik. O, həyat yolundan, ədəbiyyata qayıdışından, “Qadın istərsə” kitabının ərsəyə gəlməsindən və gələcək yaradıcılıq planlarından danışdı.
Sevil xanım, əvvəlcə oxucularımızın sizi daha yaxından tanımasını istərdik. Həyat yolunuz haqqında nə deyə bilərsiniz?
