Çin hakimiyyəti təhlükəsizlik səbəblərini əsas gətirərək Pekində dronların satışını qadağan edir və onların istifadəsinə ciddi icazə sistemi tətbiq edir. Yeni qaydalar cümə günündən qüvvəyə minəcək.
Qaydalara əsasən, dronlar və onların əsas hissələri artıq paytaxtda satıla, icarəyə verilə və ya şəhərə gətirilə bilməyəcək. Mövcud dron sahibləri isə cihazlarını polis orqanlarında qeydiyyatdan keçirməlidirlər.
Son illərdə Çin dron istifadəsi ilə bağlı qaydaları tədricən sərtləşdirib və bunu ictimai təhlükəsizliklə əlaqələndirib. Halbuki dronlar və uçan taksilər ölkənin “aşağı hündürlük iqtisadiyyatı” strategiyasının mühüm hissəsidir və bu sektorun 2035-ci ilə qədər 2 trilyon yuanı (təxminən 290 milyard dollar) keçəcəyi gözlənilir.
Çinin bir çox şəhərlərində dronlar artıq gündəlik həyatın bir hissəsinə çevrilib – yemək çatdırılması, kənd təsərrüfatı və binaların təmizlənməsi kimi sahələrdə geniş istifadə olunur.
Buna baxmayaraq, Pekin dron istifadəsi üçün ən sərt məhdudiyyətlərin tətbiq olunduğu şəhərlərdən birinə çevrilir. Yeni qaydalara görə:
Dronlar şəhərə gətirilməzdən əvvəl qeydiyyatdan keçirilməlidir
Şəhərdən kənara təmir üçün göndərilən dronlar yalnız şəxsən götürülə bilər
Açıq havada bütün uçuşlar üçün əvvəlcədən icazə alınmalıdır
İstifadəçilər onlayn təlim keçməli və testdən uğurla keçməlidirlər
Bəzi istisnalar da mövcuddur: terrorla mübarizə və fövqəladə hallar kimi məqsədlər üçün dronların alınmasına və saxlanmasına xüsusi icazə verilə bilər.
Qeyd edək ki, ötən il Pekinin hava məkanı tamamilə “dron uçuşuna qadağan zona” elan edilmişdi və yalnız müvafiq qurumların icazəsi ilə uçuşa icazə verilirdi.
Yeni qaydaların Çin dron bazarına ciddi təsir göstərəcəyi gözlənilir. Rəsmi məlumatlara görə, ölkədə 3 milyondan çox qeydiyyatdan keçmiş dron var. Dünyanın ən böyük dron istehsalçılarından biri olan DJI də bu dəyişikliklərdən təsirlənir – Pekindəki mağazalarında dron və əlaqəli məhsulların satışdan çıxarıldığı bildirilir.
Mənbə: BBC
Hazırladı: Ziyalə Əhmədli
Gundelik.az
