Rəcəb Tayyib Ərdoğan bildirib ki, texnologiya və süni intellektin sürətli inkişafı dünyada əmək bazarını kökündən dəyişir. Onun sözlərinə görə, istehsal üsulları yenilənir, bəzi peşələr aradan qalxır, eyni zamanda yeni iş sahələri yaranır və buna görə də məşğulluq sahəsində əvvəlki “qaydalar” artıq işləmir.
İstanbulda keçirilən OECD 2026 Bacarıqlar Zirvəsində çıxış edən Ərdoğan vurğulayıb ki, bu dəyişimi dayandırmaq mümkün deyil, amma onu düzgün anlamaq və idarə etmək dövlətlərin əsas vəzifəsidir.
O qeyd edib ki:
İşçi qüvvəsi bazarında ciddi dönüşüm gedir
Ölkələrin uğuru artıq insan kapitalının keyfiyyətindən asılı olacaq
Rəqəmsal və “yaşıl” transformasiya yeni bacarıqlara tələbi artırır
Ərdoğan həmçinin bildirib ki, robot texnologiyaları və süni intellekt genişləndikcə bəzi sahələrdə iş yerləri azalır, amma yeni sahələrdə ixtisaslı işçi tapmaq çətinləşir.
Onun sözlərinə görə:
Gələcəkdə “qaranlıq fabriklər” (tam avtomatlaşdırılmış istehsal) daha da yayılacaq
Təhsil sistemi dəyişməli, insanlar ömür boyu öyrənməyə davam etməlidir
Köhnə bilik kifayət deyil, onu tətbiq etmək və yeniləmək vacibdir
Ərdoğan əlavə edib ki, yaşlanan əhali, dəyişən ailə strukturu və fərdiyyətçiliyin artması da əmək bazarına təsir edir.
Sonda o vurğulayıb ki:
Qadınların və gənclərin iş həyatına cəlb olunması əsas prioritetdir
Növbəti 3 ildə 3 milyon gəncin işlə təmin edilməsi hədəflənir
Təhsil, məşğulluq və sosial siyasətlər birlikdə həyata keçirilməlidir
Mənbə: TRT Haber
Hazırladı: Ziyalə Əhmədli
Gundelik.az
