Apple yeni texnologiyaları cihazlarına tətbiq edərkən adətən tələsmir. İstər OLED ekran, istərsə də 120 Hz yeniləmə tezliyi olsun — Kupertino nəhəngi Android istehsalçılarından bir neçə il geridən gəlib. Lakin bunu edərkən şirkət texnologiyanı daha da təkmilləşdirməyə və onu daha faydalı hala gətirməyə çalışır.
Çinli insayder Digital Chat Station (DCS)-ə görə, Apple hazırda iddia edilən qatlana bilən iPhone üçün dəyişkən qalınlığa malik, ultra nazik və elastik şüşələr üzərində sınaqlar aparır. Şirkət ekran bükümünü (crease) tam aradan qaldırmaqda texniki çətinliklərlə üzləşsə də, doğru istiqamətdə irəliləyir və 2026-cı ilə qədər bükümsüz bir qatlana bilən telefon istehsal edə bilər.
Məlumata görə, Apple indiki nəsil qatlana bilən telefonlarda gördüyümüzdən daha mürəkkəb, çoxqatlı ultra nazik şüşə strukturu üzərində işləyir. Bu sistem yenidən dizayn olunmuş menteşə və ekranaltı dəstək lövhəsi ilə birləşdirilə bilər. Bu komponentlər birlikdə qatlanan hissədəki gərginliyi azaldaraq, bükümün xeyli dərəcədə az görünməsini təmin edəcək.
Lakin Apple-ın məqsədləri təkcə bükümsüz ekranla bitmir. Şirkət həm yeni olduğu zaman bükümsüz qalan, həm də minlərlə qatlanmadan — yəni bir neçə il istifadədən sonra — dərin izlər yaratmayan material həlli üzərində ciddi resurslar sərf edir. Ancaq mükəmməllik axtarışı zaman alır.
Müasir qatlana bilən telefonlar, məsələn Galaxy Z Fold 7, adi smartfonlara əvvəlkindən daha yaxın olsa da, onları geridə saxlayan əsas problem ekran bükümü və uzunmüddətli davamlılıqdır. Apple-ın daha strateji yanaşması isə məhz bu problemləri hədəfləyir. İlk qatlana bilən iPhone-un qiyməti hər kəs üçün əlçatan olmasa da, daha dayanıqlı korpusda, demək olar ki, bükümsüz ekran təklif edən ilk qatlana bilən telefon ola bilər.
Əgər ekranı bükümsüz qatlana bilən telefon almağı planlaşdırırsınızsa, 2026-cı ilin sentyabrına həm böyük həyəcanla, həm də dolu bir cüzdanla hazır olun.
Bununla belə, Apple komponentlər və büküm arasında düzgün balans tapa bilməsə, iPhone Fold-un təqdimatı 2027-ci ilə təxirə salına bilər. Bu arada isə Apple Samsung ilə birlikdə iPhone bildirişlərinin Galaxy ağıllı saatlarında göstərilməsi üzərində də işləyir — əgər bu mövzu sizi maraqlandırırsa.
Mənbə: Digital Trends
Hazırladı:Ziyalə Əhmədli
Gundelik.az
