Elektrikli avtomobil nəhəngi “Tesla” 2025-ci ilin ikinci rübündə gəlir və mənfəətinin azaldığını açıqlayıb.
Gundelik.az xarici mediaya istinadən xəbər verir ki, şirkətin iki rüblük ardıcıl mənfi qazancı, CEO İlon Maskın siyasi seçimləri ətrafında yaranan mübahisələrdən sonra brendin reputasiyasının zədələnməsi ilə əlaqələndirilir.
“Tesla” aprel-iyun aylarını əhatə edən üç aylıq dövrdə 22,5 milyard satış edib. Bu göstərici ötən ilin müvafiq dövrü ilə müqayisədə 12% azdır. Səhm başına qazanc 40 sent olub, illik müqayisədə 23% azalıb.
Bu rəqəmlər “Wall Street”in gözlənilən 22,74 milyard dollar gəlir və 43 sentlik mənfəət hədəfinə çatmayıb. “Tesla” səhmləri ticarətdə 2 faiz ucuzlaşıb.
Mask: “Bizim prioritetimiz muxtariyyətdir”
İnvestorlarla telekonfransda çıxış edən İlon Mask şirkətin gələcəyinin “robotaxi” layihəsindən asılı olduğunu bildirib.
Mask Ostində məhdud sürücüsüz avtomobil təqdim edib. İlin sonunadək ABŞ əhalisinin yarısına çatmaq istədiyini açıqlayıb. Bununla belə, o, bu hədəfin tənzimləyicilərin təsdiqindən və təhlükəsizlik performansından asılı olduğunu etiraf edib.
Mask həmçinin Kaliforniya, Arizona və Florida kimi ştatların onun növbəti hədəfləri olduğunu qeyd edib. Bununla belə, Ostində robotaxi xidməti hazırda kifayət qədər məhduddur: maşınlarda hələ də insan müşahidəçiləri var. Bu, “Tesla”nı “Google”un törəmə şirkəti olan və robot taksi sənayesində lider hesab edilən “Waymo”dan xeyli geridə qoyur.
Şirkət öz şəxsiyyətini dəyişdirməyə çalışır
“Tesla” investorlara yazdığı qeyddə bu rübü “şirkət tarixində dönüş nöqtəsi” kimi xarakterizə etdi. Şirkətin yeni məhsul planlarına insanabənzər robotlar daxildir. Lakin Maskın tez-tez önə çıxardığı bu layihələr hələ də bazara çıxarılmayıb.
Siyasi təsirlər, etirazlar və nüfuzun zədələnməsi
İlon Maskın sağçı siyasətlə eyniləşdirilməsi və Donald Trampın Mask ilə yüksək səviyyəli mübahisələri ictimaiyyətin əhəmiyyətli bir hissəsində mənfi rəy yaradıb. “Neyt Silver”in keçirdiyi sorğuya görə, amerikalıların 58 faizi Mask haqqında mənfi, 33 faizi isə müsbət fikirdədir. Maskın Ağ Evdə zəncirvari mişarla simvolik nümayişlər etdiyi Tramp administrasiyasının müşaviri kimi fəaliyyəti də ictimai qınağa səbəb olub.
Mask mayın 30-da bu vəzifədən istefa verib.
“Tesla” da bu dövrdə avtomobil tədarüklərində azalma yaşayıb. Şirkət ikinci rübdə keçən ilin eyni dövrü ilə müqayisədə 14 faiz az avtomobil tədarük edib. Çinli elektrik avtomobil istehsalçılarının artan rəqabəti də bu azalmaya səbəb olub.
Hüquqi və tənzimləyici maneələr
“Tesla” da hüquqi və tənzimləyici çətinliklərlə üzləşir. Mayami və Oklenddə iki ayrı məhkəmə prosesi “Tesla”nın özünün avtopilot və tam özünü idarə edən proqram təminatının imkanlarını həddən artıq şişirtmədiyini araşdırır.
Həmçinin Tramp administrasiyasının gətirdiyi gözlənilməz vəziyyət – gömrük tarifləri, vergilərin və ekoloji tənzimləyici kreditlərin silinməsi də “Tesla”nın gəlir axınlarına mənfi təsir göstərir.
“Tesla” 2025-ci ilin ikinci yarısında maliyyə və reputasiya baxımından ən çətin dövrlərindən birini yaşayır.
Gundelik.az
