Bu ilin yanvar-iyun ayları ərzində Türkiyə 77 ölkə, muxtar bölgə və azad iqtisadi zonaya ümumilikdə 6 milyard 318 milyon 306 min dollar dəyərində minik avtomobili ixrac edib.
Bu barədə Gundelik.az Uludağ Avtomobil Sənayesi İxracatçıları Birliyinə istinadən xəbər verir.
Bu dövrdə avtomobil sənayesinin ümumi ixracı 19 milyard 985 milyon 534 min dollar təşkil edib və bunun 31,6 faizini minik avtomobili ixracı təşkil edib. Ötən ilin eyni dövrü ilə müqayisədə bu göstərici 12 faiz artaraq 5 milyard 642 milyon 528 min dollardan 6 milyard 318 milyon 306 min dollara yüksəlib.
Ən çox ixrac edilən ölkələr
Ən çox minik avtomobili ixrac edilən ölkələr arasında Fransa birinci yerdə qərarlaşıb. Bu ölkəyə ixrac 6,3 faiz artaraq 1 milyard 22 milyon 68 min dollardan 1 milyard 87 milyon 169 min dollara çatıb.
İkinci yerdə olan İspaniyaya ixrac ötən ilin eyni dövrü ilə müqayisədə 26 faiz artaraq 618 milyon 604 min dollardan 784 milyon 137 min dollara yüksəlib.
Üçüncü sırada olan İtaliyaya minik avtomobili ixracı isə azalma göstərərək 710 milyon 257 min dollardan 703 milyon 636 min dollara geriləyib.
Böyük Britaniya 665 milyon 671 min dollarlıq ixracla dördüncü, Almaniya isə 565 milyon 33 min dollarlıq ixracla beşinci yerdə qərarlaşıb.
Sürətli artım göstərən bazarlar
Altıncı yerdə qərarlaşan Sloveniyaya minik avtomobili ixracı 144 faiz artaraq 189 milyon 94 min dollardan 462 milyon 381 min dollara yüksəlib.
Polşa 395 milyon 38 min dollarla yeddinci, Belçika 287 milyon 479 min dollarla səkkizinci, Portuqaliya 149 milyon 897 min dollarla doqquzuncu, Yunanıstan isə 125 milyon 23 min dollarla onuncu sırada yer alıb.
Qeyd edək ki, minik avtomobili ixracatında ilk 10 ölkədən 9-u Avropa Birliyi ölkələridir.
Gundelik.az
