Son illər Azərbaycan beynəlxalq tədbirlərin yüksək səviyyədə təşkili və qlobal platformalarda fəal iştirakı ilə dünyanın diqqət mərkəzində olan ölkələrdən birinə çevrilib. Xüsusilə COP29 kimi mötəbər tədbirin uğurla keçirilməsi Azərbaycanın beynəlxalq nüfuzunu daha da artırdı və ölkənin təşkilatçılıq imkanlarını dünyaya nümayiş etdirdi. İndi isə urbanizasiya, şəhərsalma və dayanıqlı inkişaf məsələlərinə həsr olunan WUF13 forumunun Azərbaycanda keçirilməsi ölkəmizin qlobal proseslərdə artan rolunun növbəti göstəricisi kimi qiymətləndirilir.
Politoloq, elmlər doktoru Elşad Mirbəşiroğlu Gundelik.az xəbər portalına müsahibəsində WUF13 forumunun Azərbaycanın beynəlxalq imicinə təsiri, Qarabağ və Şərqi Zəngəzurda həyata keçirilən ağıllı şəhər konsepsiyası, ölkənin formalaşdırdığı yeni beynəlxalq standartlar və forumun siyasi-iqtisadi əhəmiyyəti barədə fikirlərini bölüşüb.
Elşad müəllim, WUF13 forumunun Azərbaycanda keçirilməsini necə qiymətləndirirsiniz?
– WUF13 forumunun Azərbaycanda keçirilməsi sözsüz ki, ölkəmizin beynəlxalq pozitiv imicini daha da gücləndirən mühüm hadisədir. Belə mötəbər tədbirlərin Azərbaycanda təşkili həm praktiki, həm də geosiyasi baxımdan böyük əhəmiyyət daşıyır. Bildiyimiz kimi, 2024-cü ildə ölkəmizdə COP29 çox yüksək səviyyədə təşkil olundu və dünyanın müxtəlif ölkələrindən minlərlə qonaq Azərbaycana səfər etdi. Bu dəfə də WUF13 forumunun keçirilməsi Azərbaycanın yeni beynəlxalq standartlar yaratmaq gücünü bir daha nümayiş etdirəcəkdir.
–Azərbaycanın beynəlxalq tədbirlərin təşkili sahəsində formalaşdırdığı təcrübəni necə dəyərləndirirsiniz?
– Bu günə qədər Azərbaycanda keçirilən qlobal tədbirlər ölkəmizin unikal təşkilatçılıq təcrübəsi formalaşdırdığını göstərib. Sonrakı mərhələlərdə biz müşahidə etdik ki, Azərbaycanın tətbiq etdiyi yanaşmalar və standartlar digər ölkələrdə də nümunə kimi istifadə olunur. Bu baxımdan WUF13 forumu da Azərbaycanın beynəlxalq tədbirlərin təşkili sahəsində yeni uğurlarından biri olacaq.
Qarabağ və Şərqi Zəngəzurda həyata keçirilən layihələrin forum baxımından əhəmiyyəti nədən ibarətdir?
– Azərbaycanda hazırda şəhərsalma və arxitektura sahəsində çox fəal işlər aparılır. Xüsusilə işğaldan azad olunmuş Qarabağ və Şərqi Zəngəzur ərazilərində genişmiqyaslı bərpa-quruculuq prosesi həyata keçirilir. Burada “ağıllı şəhər” və “ağıllı kənd” konsepsiyaları tətbiq olunur. Hesab edirəm ki, bu yanaşma dünya üçün də unikal təcrübədir və Azərbaycanın müasir şəhərsalma siyasətini beynəlxalq ictimaiyyətə nümayiş etdirmək baxımından mühüm əhəmiyyət daşıyır.
Forumun iqtisadi və turizm baxımından ölkəyə hansı töhfələri ola bilər?
– Forum çərçivəsində ölkəmizə çoxsaylı xarici iştirakçılar səfər edəcəklər. Bu isə həm turizmin inkişafı, həm də beynəlxalq təcrübə mübadiləsinin genişlənməsi baxımından əhəmiyyətlidir. Eyni zamanda şəhərsalma, arxitektura və investisiya imkanları ilə bağlı müzakirələrin aparılması Azərbaycanın yeni investisiyalar cəlb etməsi üçün də əlverişli şərait yarada bilər.
WUF13 forumunun Azərbaycanın beynəlxalq münasibətlər sistemindəki mövqeyinə təsiri barədə nə deyə bilərsiniz?
– Bu forum Azərbaycanın müasir beynəlxalq münasibətlər sistemində yerinin və rolunun daha da möhkəmlənməsinə xidmət edəcək. Dünya ictimaiyyəti bir daha görəcək ki, rəsmi Bakı mötəbər beynəlxalq tədbirlərə yüksək peşəkarlıq və böyük təcrübə ilə ev sahibliyi edir. Bu da Azərbaycanın beynəlxalq nüfuzunun artmasına mühüm töhfə verəcəkdir.
Jalə Əliyeva
