Ağırlıq məşqlərinin yalnız əzələ inkişaf etdirmək üçün olmadığı məlum olub. Yeni araşdırma göstərir ki, müntəzəm idman ömrün uzanmasına da kömək edir. Xüsusilə kardio məşqləri ilə birlikdə edilən ağırlıq məşqləri diqqət çəkir.
ABŞ-da aparılan və təxminən 150 min səhiyyə işçisinin 30 il ərzində izlənildiyi tədqiqat maraqlı nəticələr ortaya qoyub. Araşdırmaya görə, həftədə 90–120 dəqiqə ağırlıq məşqləri edən insanların erkən ölüm riski bu məşqləri etməyənlərlə müqayisədə daha aşağıdır.
Ən diqqətçəkən nəticə isə ağırlıq məşqlərini kardio fəaliyyətləri ilə birləşdirənlərdə müşahidə olunub. Gəzinti, qaçış, üzgüçülük və ya velosiped sürmə kimi kardio məşqlərini ağırlıq məşqləri ilə birlikdə edən şəxslərdə erkən ölüm riski əhəmiyyətli dərəcədə azalır.
Tədqiqatın nəticələrinə görə:
Həftədə 90–120 dəqiqə ağırlıq məşqi edənlərdə erkən ölüm riski 13% daha aşağıdır.
Tövsiyə olunan həftəlik 150 dəqiqə kardio məşqinə əlavə olaraq 1–2 saat ağırlıq məşqi edənlərdə isə erkən ölüm riski 45%-ə qədər azalır.
Mütəxəssislərin sözlərinə görə, əzələ toxuması yalnız güc və fiziki görünüş üçün vacib deyil. O, həmçinin qan şəkərinin tənzimlənməsi, iltihab proseslərinin nəzarətdə saxlanılması və ümumi maddələr mübadiləsinin sağlam işləməsində mühüm rol oynayır.
Araşdırma bir daha göstərir ki, müntəzəm hərəkət və fiziki aktivlik daha uzun, sağlam və keyfiyyətli həyatın ən güclü açarlarından biridir. Həftədə cəmi 1–2 saat ağırlıq məşqi belə sağlamlığa əhəmiyyətli fayda verir.
Mənbə:CNN Türk
Hazırladı:Ziyalə Əhmədli
Gundelik.az
