Uşaqlarda adenoid (burun-udlağın badamcığı) və badamcıq problemləri xüsusilə yuxu pozğunluğu, nəfəsalma çətinliyi və tez-tez təkrarlanan infeksiyalar səbəbindən gündəmə gəlir. Əməliyyat qərarından sağalma dövrünə qədər bir çox məsələ valideynləri narahat edir. Mütəxəssislər isə tibbi zərurət olduqda bu əməliyyatların təhlükəsiz şəkildə həyata keçirildiyini bildirirlər.
Qulaq-burun-boğaz mütəxəssisi, cərrah Bekir Oksay valideynlərin ən çox maraqlandığı suallara aydınlıq gətirib.
Valideynləri ən çox narahat edən məsələlər
Adenoid və badamcıq əməliyyatları ilə bağlı ən çox verilən suallar bunlardır:
Ümumi anesteziyanın təhlükəsizliyi
Əməliyyatdan sonra qidalanma qaydaları
Uşağın məktəbə nə vaxt qayıda biləcəyi
Badamcıqların götürülməsinin immunitet sisteminə təsiri
Badamcıqların götürülməsi immuniteti zəiflədir?
Mütəxəssis bildirir ki, badamcıqlar immun sisteminin bir hissəsi olsa da, onların götürülməsi gələcəkdə ciddi immun problemlərinə səbəb olmur.
Onun sözlərinə görə, badamcıq və adenoid xüsusilə həyatın ilk 18 ayında immun sisteminin formalaşmasında müəyyən rol oynayır. Buna görə də 18 aydan kiçik uşaqlarda bu əməliyyatlara daha ehtiyatla yanaşılır və yalnız zəruri hallarda icra edilir.
Lakin sonrakı dövrdə badamcıqların götürülməsi uşağın immunitetinin zəifləyəcəyi demək deyil. Orqanizmdə mikroblarla mübarizə aparan müxtəlif müdafiə mexanizmləri mövcuddur və onlar bu funksiyanı davam etdirirlər.
Mütəxəssisin fikri
Bekir Oksay vurğulayır:
“Badamcıqların götürülməsi uşağın immun sisteminin zəifləyəcəyi anlamına gəlmir. Orqanizmdə infeksiyalarla mübarizə aparan başqa müdafiə mexanizmləri də var. Buna görə də tibbi zərurət olduqda aparılan badamcıq əməliyyatı gələcəkdə immunitet baxımından ciddi problem yaratmır.”
Mütəxəssislərin fikrincə, tez-tez infeksiyalara məruz qalan, nəfəsalma və ya yuxu problemləri yaşayan uşaqlarda adenoid və badamcıq əməliyyatı sağlamlıq vəziyyətini əhəmiyyətli dərəcədə yaxşılaşdırır. Əsas məsələ əməliyyat qərarının həkim müayinəsi və tibbi göstəriş əsasında verilməsidir.
Mənbə:CNN Türk
Hazırladı:Ziyalə Əhmədli
Gundelik.az
