Donald Tramp Venesuelanın yeni lideri Delsi Rodrigesə xəbərdarlıq edərək bildirib ki, əgər o, “doğru olanı etməsə”, “çox böyük bir bədəl ödəyə bilər – hətta Madurodan da böyük”.
Tramp bu fikirləri ABŞ-ın The Atlantic jurnalına verdiyi müsahibədə səsləndirib. Bu açıqlama Venesuelanın devrilmiş prezidenti Nikolas Maduronun bazar ertəsi Nyu-York məhkəməsində hakim qarşısına çıxmağa hazırlaşdığı vaxta təsadüf edir.
ABŞ Maduronu narkotik alveri və silah qaçaqmalçılığı ittihamları ilə günahlandırır və onun “narko-terrorçu rejim” idarə etdiyini iddia edir. Maduro isə bu ittihamları rədd edir.
Maduronun vitse-prezidenti olmuş Rodriges bazar günü keçirilən ilk Nazirlər Kabineti iclasında daha yumşaq mövqe nümayiş etdirərək ABŞ-la əməkdaşlığa hazır olduğunu bildirib.
“Biz ABŞ hökumətini beynəlxalq hüquq çərçivəsində ortaq inkişafı hədəfləyən əməkdaşlıq gündəliyi üzrə bizimlə işləməyə dəvət edirik,” – deyə o bildirib.
Venesuelanın Ali Məhkəməsi və ordunun dəstəyi ilə Rodriges bazar ertəsi Karakasda yerli vaxtla saat 08:00-da (GMT ilə 12:00) prezident kimi and içəcək.
ABŞ Dövlət katibi Marko Rubio şənbə günü Karakasda endirilən hava zərbələrindən sonra ABŞ-ın Venesuela ilə müharibə aparmadığını bildirib. Həmin zərbələr nəticəsində Maduro və həyat yoldaşı saxlanılaraq ABŞ-a aparılıb.
Bəzi Demokrat Partiyasından olan qanunvericilər isə bu əməliyyatı “müharibə aktı” adlandırıblar.
Tramp bazar günü The Atlantic jurnalına verdiyi müsahibədə Rodriges barədə deyib:
“Əgər o, doğru olanı etməsə, çox böyük bir bədəl ödəyəcək – ehtimal ki, Madurodan da böyük.”
O əlavə edib ki, Venesuela üçün “rejim dəyişikliyi – necə adlandırmaq istəsəniz – indiki vəziyyətdən daha yaxşıdır. Daha pis ola bilməz.”
Şənbə günü Tramp ABŞ-ın ölkəni “təhlükəsiz, düzgün və ədalətli keçid” mümkün olana qədər idarə edəcəyini vəd edib.
O, həmçinin ABŞ neft şirkətlərinin Venesuelaya daxil olaraq infrastrukturu bərpa edəcəyini və “ölkə üçün gəlir əldə etməyə başlayacağını” bildirib.
ABŞ prezidentinin iddialarına baxmayaraq, Maduronun müttəfiqləri hələ də ölkədə əsas nəzarəti saxlayırlar.
Kuba hökuməti ABŞ qüvvələrinin Maduronu və həyat yoldaşını ələ keçirdiyi hücum zamanı 32 “cəsur kubalı döyüşçünün” həlak olduğunu açıqlayıb.
Maduronun uzunmüddətli sosialist müttəfiqi olan Kuba ölkədə iki günlük milli matəm elan edib.
Mənbə: BBC
Hazırladı: Ziyalə Əhmədli
Gundelik.az
