Avstraliya, ABŞ, Böyük Britaniya, Yeni Zelandiya və Kanadadan ibarət olan “Beş Göz” (Five Eyes) kəşfiyyat alyansına bağlı kibertəhlükəsizlik qurumları yaydıqları bəyanatda hökumətlərə və şirkətlərə qarşı dağıdıcı kiberhücumlar həyata keçirmək qabiliyyətinə malik güclü süni intellekt modellərinin istifadəyə verilməsinə cəmi bir neçə ay qaldığını bildiriblər.
Bu ictimai xəbərdarlıq ABŞ Prezidenti Donald Tramp administrasiyasının bu ayın əvvəlində xarici vətəndaşların Anthropic şirkəti tərəfindən hazırlanmış “Fable” adlı süni intellekt modelindən istifadəsini məhdudlaşdırmaq qərarından sonra gəlib.
Bazar ertəsi axşamı yayımlanan birgə bəyanatda qeyd olunub ki, süni intellekt zaman keçdikcə kibermüdafiənin güclənməsinə kömək etsə də, eyni zamanda kiber təhdidlərin sürətini, miqyasını və mürəkkəbliyini artırır.
Bəyanatda deyilir:
“Qabaqcıl süni intellekt modellərinin mövcud sənaye gözləntilərini üstələyəcəyi, həm hücum, həm də müdafiə yönümlü kiber imkanları kökündən dəyişdirəcəyi gözlənilir.
Qarşıdakı dövr artıq illərlə deyil, aylarla ölçülür. Belə bir şəraitdə kiberdavamlılıq biznes fəaliyyətinin davamlılığı, bazara inam və uzunmüddətli dəyər yaradılması üçün həyati əhəmiyyət daşıyır.”
“Kiber risk artıq yalnız texniki məsələ deyil”
Kəşfiyyat alyansı bildirib ki, süni intellekt modellərindəki sürətli inkişaf pis niyyətli şəxslərin qarşısındakı maneələri azaldacaq, hücumların sürətini və mürəkkəbliyini artıracaq.
Bəyanatda vurğulanıb ki, bütün qurumlar və cəmiyyət bu təhlükəyə qarşı birlikdə hərəkət etməlidir:
“Kiber risk artıq yalnız texniki məsələ kimi qiymətləndirilə bilməz. Bu, birbaşa biznes riski və rəhbərlik məsuliyyətidir.”
Generativ süni intellekt modelləri kibertəhlükəsizlik sistemlərindəki boşluqları aşkar etmək, onlardan istifadə etmək və ya onları aradan qaldırmaq qabiliyyətinə malik yeni alətlər kimi diqqət çəkir.
Sidney Universitetinin Amerika Araşdırmaları Mərkəzinin milli təhlükəsizlik və süni intellekt üzrə eksperti Olivia Şen bildirib ki, son nəsil modellər “istismar kodları (exploit) yaratmaqda olduqca uğurludur”.
Diqqətlər Anthropic şirkətinin modellərinə yönəlib
“Beş Göz” alyansının bəyanatında hər hansı şirkətin və ya modelin adı birbaşa çəkilməsə də, qlobal diqqət Anthropic şirkətinin inkişaf etdirdiyi qabaqcıl alətlərə yönəlib.
Şirkətin son məhsullarından biri sistemlərdəki boşluqları aşkar edə bilən “Mythos” modelinin daha geniş istifadəçi kütləsi üçün uyğunlaşdırılmış versiyası olan “Fable 5” hesab olunur.
Çox güclü proqram təminatı olan Mythos mümkün sui-istifadə risklərinə görə yalnız yoxlanılmış və təsdiqlənmiş təşkilatların istifadəsinə təqdim edilir.
İyun ayında ABŞ hökuməti milli təhlükəsizlik qurumlarının tövsiyəsi əsasında Anthropic-in hər iki modelindən xarici vətəndaşların istifadəsini müvəqqəti dayandırıb.
Mütəxəssislərin fikrincə, dünya hazırda Anthropic-in növbəti addımını diqqətlə izləyir. Bununla yanaşı, oxşar gücə malik yeni modellərin də yaxın vaxtlarda ortaya çıxacağı, Çin və ya digər dövlət və qeyri-dövlət aktorlarının da eyni səviyyədə qabaqcıl texnologiyalar inkişaf etdirə biləcəyi ehtimal edilir.
Bu nə deməkdir?
Sadə dillə desək, ekspertlər xəbərdarlıq edirlər ki, yaxın aylarda bəzi süni intellekt sistemləri:
Kompüter sistemlərindəki zəiflikləri daha sürətli tapa biləcək;
Hakerlərin istifadə etdiyi hücum kodlarını daha asan yarada biləcək;
Kiberhücumları avtomatlaşdıraraq daha geniş miqyasda həyata keçirə biləcək;
Eyni zamanda müdafiə sistemlərini də gücləndirə biləcək.
Yəni süni intellekt həm müdafiəçilərin, həm də hücum edənlərin imkanlarını artıracaq və bu səbəbdən kibertəhlükəsizlik yaxın illərin ən vacib məsələlərindən biri olacaq.
Mənbə:TRT Haber
Hazırladı:Ziyalə Əhmədli
Gundelik.az
