Qlobal ərzaq qiymətləri gömrük tariflərindəki qeyri-müəyyənliklər səbəbindən aprel ayında əvvəlki ayla müqayisədə 1 faiz artaraq 2023-cü ilin martından bu yana ən yüksək səviyyəyə çatıb.
Gundelik.az xəbər verir ki, bu barədə Birləşmiş Millətlər Təşkilatının (BMT) Ərzaq və Kənd Təsərrüfatı Təşkilatının (FAO) hesabatında bildirilib.
Məlumata görə, ərzaq məhsullarının beynəlxalq qiymətlərində aylıq dəyişiklikləri izləyən FAO-nun Ərzaq Qiymətləri İndeksi aprel ayında mart ayı ilə müqayisədə 1 faiz artaraq orta hesabla 128,3 bənd təşkil edib. Beləliklə, indeks ardıcıl üçüncü ay artaraq 2023-cü ilin mart ayından bəri ən yüksək səviyyəyə çatıb.
Ötən ilin aprel ayı ilə müqayisədə artım tempi 7,6 faiz təşkil edib. Taxıl, ət və süd məhsullarının qiymətlərinin artması şəkər və bitki yağlarının ucuzlaşmasını üstələdiyi üçün qlobal ərzaq qiymətləri artmaqdadır.
“Valyuta məzənnəsinin dəyişməsi qlobal bazarlarda qiymət hərəkətlərinə təsir etsə də, gömrük tarif siyasətinə düzəlişlər bazardakı qeyri-müəyyənliyi artırdı”, – hesabatda qeyd olunub.
Taxıl Qiyməti İndeksi aylıq 1,2 faiz artıb, illik 0,5 faiz azalıb.
Bu artıma Rusiyada tədarükün sıxlığı ilə bağlı narahatlıqlar səbəbindən buğda qiymətlərinin artması səbəb olub.
Cənub-Şərqi Asiyanın əsas istehsalçı ölkələrində mövsümi artıma görə palma yağının qiymətləri əhəmiyyətli dərəcədə azaldığı üçün Bitki Yağı Qiymətləri İndeksi aylıq 2,3 faiz azalma qeydə alınıb. İndeksdə illik artım 20,7 faiz təşkil edib.
Günəbaxan yağının qiymətləri sabit qalıb.
Şəkər Qiyməti İndeksi, əsasən qeyri-müəyyən qlobal iqtisadi mənzərə ilə bağlı narahatlıqlar və onun qlobal şəkər istehlakının əsas hissəsini təşkil edən içki və qida sektorundan olan tələbata potensial təsiri ilə əlaqədar olaraq 3,5 faiz azalıb.
FAO Süd Məhsullarının Qiymətləri İndeksi Avropada ehtiyatların azalması səbəbindən beynəlxalq kərə yağı qiymətlərinin bütün zamanların ən yüksək həddinə çatması səbəbindən 2,4 faiz artıb. İndeksdə illik artım 22,9 faiz təşkil edib.
Ət Qiymətləri İndeksi isə 3,2 faiz artıb.
Gundelik.az