Rusiyada Ukraynanın Moskva, Qara dəniz sahilləri və digər bölgələrdə enerji infrastrukturuna raket və pilotsuz uçuş aparatları ilə endirdiyi zərbələrin təsiri uzun müddətdir hiss olunur.
Yanacaqdoldurma məntəqələrində növbələr yaranıb, yanacaq paylanmasına məhdudiyyətlər tətbiq edilir, neft emalı zavodları hədəfə alınır. Rusiyanın ilhaq etdiyi Krım yarımadasında isə hərbi texnikaya üstünlük verilməsi məqsədilə mülki sürücülərə yanacaq doldurmaq qadağan olunub.
Vəziyyətin ciddiliyi artıq o həddə çatıb ki, bunu Rusiya prezidenti Vladimir Putin ilk dəfə açıq şəkildə etiraf edib.
Həftəsonu Putin yüksək vəzifəli rəsmilər və neft sənayesi rəhbərləri ilə yanacaq böhranını müzakirə edib. O, çıxışı zamanı adətindən fərqli olaraq vəziyyəti gizlətməyib.
“Bilirsiniz ki, həm sürücülər, həm də sahibkarlar üçün problemlər qalmaqdadır. Təəssüf ki, yanacaqdoldurma məntəqələrində hələ də növbələr var və lazımi markalı benzini tapmaq həmişə mümkün olmur”, – deyə o bildirib.
Putin kənd təsərrüfatının da çətinliklərlə üzləşdiyini vurğulayaraq qeyd edib ki, məhsul yığımının uğuru yanacaq təchizatı qrafikinin vaxtında yerinə yetirilməsindən asılıdır.
Müstəqil rus nəşri Mediazonanın məlumatına görə, hazırda Rusiyanın 56 regionunda yanacaqla bağlı müxtəlif məhdudiyyətlər qüvvədədir.
Daha sonra dövlət televiziyasına müsahibəsində Putin Ukraynanın hücumlarının “aydın şəkildə problemlər yaratdığını” etiraf edib.
“Hazırda müəyyən yanacaq çatışmazlığı müşahidə olunur, lakin vəziyyət kritik deyil”, – deyə o bildirib.
Putin enerji infrastrukturunu qorumaq üçün hava hücumundan müdafiə sistemlərinin istehsalının artırılacağını və zərər görmüş neft emalı zavodlarının bərpasının sürətləndiriləcəyini vəd edib.
Krım barədə danışarkən isə yarımadada cəmi “bir neçə günlük yanacaq ehtiyatı” qaldığını etiraf etsə də, yaxın zamanda yeni tədarükün həyata keçiriləcəyinə əmin olduğunu bildirib.
Ekspertlərin fikrincə, Putinin Ukrayna zərbələrinin Rusiya əhalisinə təsirini bu qədər açıq şəkildə etiraf etməsi nadir hadisədir. Görünür, yanacaq qıtlığının geniş vüsət alması və bunun artıq cəmiyyət tərəfindən hiss olunması Kremlin bu reallığı qəbul etməsinə səbəb olub. Bununla yanaşı, Putin yenə də Rusiyanın müharibədə irəliləyiş əldə etdiyini iddia edib.
Krımdakı çətinliklərin etiraf edilməsi xüsusi əhəmiyyət daşıyır. Çünki 2014-cü ildə yarımadanın işğalından sonra Moskva onu böyük hərbi bazaya və Qara dənizə nəzarət üçün strateji mərkəzə çevirib, həmçinin 2022-ci ildə Ukraynaya genişmiqyaslı hücum üçün əsas platformalardan biri kimi istifadə edib.
Müsahibədə Putin bildirib ki, Ukrayna bu hücumlarla Rusiya cəmiyyətini parçalamağa, müharibəyə dəstəyi zəiflətməyə və danışıqlara təzyiq yaratmağa çalışır.
“Biz onlara bu imkanı verməyəcəyik”, – deyən Putin əlavə edib ki, Ukraynanın uzaqmənzilli zərbələri cəbhədəki vəziyyətə “heç bir təsir göstərmir”.
Kiyev isə bu iddianı qəbul etmir. Ukrayna rəsmilərinin fikrincə, uzaqmənzilli hücumların məqsədi müharibəni Rusiya ərazisində hiss etdirmək, eyni zamanda Moskvanı cəbhədən hava hücumundan müdafiə vasitələrini geri çəkməyə məcbur etməkdir.
Son aylarda Ukrayna Sankt-Peterburq və Moskva istiqamətində dərin zərbələri artırıb, Krıma hücumları intensivləşdirib və cəbhədə Rusiya qüvvələrinə mümkün qədər çox itki verməyə çalışdığını açıq şəkildə nümayiş etdirir.
Bununla belə, Kremlin sözçüsü Dmitry Peskov bildirib ki, Rusiyanın məqsədi dəyişməyib: Moskvanın öz ərazisi hesab etdiyi Ukraynanın cənub-şərqindəki dörd vilayətin Ukrayna qüvvələri tərəfindən tərk edilməsinə nail olmaq.
Putin müsahibəsində həmçinin iddia edib ki, Ukrayna hərbi əməliyyatları məhdudlaşdırmaq və danışıqlara başlamaq təklif edir. Lakin onun sözlərinə görə, bu, Kiyevin qüvvələrini yenidən toplamaq və silahlandırmaq üçün vaxt qazanmaq cəhdidir.
“Bizim Ukraynanın dərinliklərinə endirdiyimiz cavab zərbələri daha güclü, daha təsirli və açığı, daha dağıdıcıdır”, – deyə Putin bildirib.
O, həmçinin Ukraynanın Rusiyaya hücumlarını “Ukrayna ordusunun xilası” kimi qiymətləndirərək ordunun “fəlakətli vəziyyətdə” olduğunu iddia edib və əlavə edib:
“Ancaq Kiyev rejimini xilas etmək bizim planlarımızın bir hissəsi deyil.”
Mənbə:BBC
Hazırladı:Ziyalə Əhmədli
Gundelik.az
