ChatGPT-nin yaradıcısı olan OpenAI ABŞ-da səhmlərini ictimaiyyətə satmaq üçün fond birjasında yerləşdirilmə (IPO) planlarını açıqlayıb.
Şirkət bazar ertəsi bildirib ki, gələcəkdə İlkin İctimai Təklif (IPO) həyata keçirmək məqsədilə ABŞ Qiymətli Kağızlar və Birja Komissiyasına (SEC) məxfi müraciət edib.
OpenAI açıqlamasında deyib:
“Hələlik dəqiq vaxt müəyyənləşdirməmişik. Bu bir qədər vaxt apara bilər, çünki özəl şirkət olaraq həyata keçirməyin daha asan olduğu bəzi planlarımız var.”
Bu qərar aylardır gözlənilsə də, müraciətin edilməsi rəqib süni intellekt şirkəti Anthropic-in də bir həftə əvvəl IPO planlarını açıqlamasından dərhal sonra baş verib.
Həm OpenAI, həm də Claude çatbotunun yaradıcısı Anthropic, yaxın günlərdə Nasdaq birjasında debüt etməyə hazırlaşan SpaceX-in yolunu izləyir. SpaceX səhmlərinin şirkətə təxminən 1,75 trilyon dollar dəyər qazandıracağı gözlənilir.
Lakin OpenAI və Anthropic arasında rəqabət daha dərindir. Anthropic-in həmtəsisçisi Dario Amodei beş il əvvəl fikir ayrılıqlarına görə OpenAI-dən ayrılıb. Onun ayrıldığı şəxs isə OpenAI-nin həmtəsisçisi və baş direktoru Sam Altman idi.
Hazırda hər iki şirkət istifadəçilər, korporativ müştərilər və investorlar uğrunda mübarizə aparır. Onların özəl bazardakı dəyərləndirmələri artıq 1 trilyon dollara yaxınlaşır.
OpenAI-nin son özəl bazar dəyəri: 852 milyard dollar
Anthropic-in son özəl bazar dəyəri: 965 milyard dollar
Hələlik heç biri birjaya dəqiq nə vaxt çıxacağını açıqlamayıb. Keçən həftə Sam Altman CNBC-yə müsahibəsində IPO məsələsində tələsmədiyini və bunu yalnız “uyğun vaxt gələndə” edəcəyini bildirmişdi.
OpenAI isə bildirib ki, IPO planlarını açıqlamasının səbəbi bu məlumatın onsuz da ictimaiyyətə sızacağını gözləməsidir. Şirkət qeyd edib ki, birjaya çıxmaq qərarı “mürəkkəb üstünlüklər və risklər balansıdır”. Lazımi sənədlər SEC tərəfindən nəzərdən keçirildikdən sonra OpenAI-nin istəsə, daha tez bir zamanda birjaya çıxmaq imkanı olacaq.
Niyə birjaya çıxmaq istəyirlər?
OpenAI, Anthropic və süni intellekt çatbotu Grok-un sahibi olan SpaceX üçün IPO milyardlarla dollar yeni kapital cəlb etmək imkanı yaradır.
Süni intellekt şirkətləri üçün ən böyük xərclərdən biri “compute”, yəni modellərin hazırlanması, öyrədilməsi, sınaqdan keçirilməsi və istifadəçilərə təqdim olunması üçün lazım olan hesablama infrastrukturu və emal gücüdür.
Məlumata görə:
OpenAI-nin illik hesablama xərcləri 100 milyard dollardan çoxdur və bu, şirkətin gəlirlərindən xeyli yüksəkdir.
SpaceX də hələ tam mənfəətli şirkət hesab olunmur.
Anthropic isə investorlara bildirib ki, Claude məhsulu və əlaqəli xidmətlərin satışlarının sürətlə artması sayəsində bu ilin ilk yarısında mənfəət əldə etməyi gözləyir.
Birjaya çıxdıqdan sonra isə hər üç şirkət hər rüb maliyyə nəticələrini və biznes göstəricilərini ictimaiyyətə açıqlamalı olacaq.
Mənbə:BBC
Hazırladı:Ziyalə Əhmədli
Gundelik.az
